လွင်ႈမီးသတိပၺ်ႇၺႃႇ

 

လွင်ႈမီးသတိပၺ်ႇၺႃႇ

 

ၼႂ်းသၵျႃႇဝႃႇလႃႇလူင်ၼႆႉ ၽြႃးပဵၼ်ၸဝ်ႈႁူႉႁၼ်ၸႅင်ႈတၢင်းမူတ်းယဝ်ႉ

ၼႂ်းသၵျႃႇဝႃႇလႃႇလူင်ၼႆႉ ၽြႃးပဵၼ်ၸဝ်ႈမျႅတ်ႈတွၼ်းလိူဝ်သုတ်းယဝ်ႉ

ၽြႃးပဵၼ်ၸဝ်ႈဢဝ်ပေႉလႆႈၶုၼ်သူင်ၽီႁၢႆႉၽီလိူင်းလႆႈတၢင်းသဵင်ႈ

ၽြႃးပဵၼ်ၸဝ်ဢဝ်ပေႉလႆႈၽူႈမီးၸႂ် ဢၶတိ ၽူႈႁၼ်ၽိတ်း ၽူႈဝူၼ်ႉၽိတ်း

ၽူႈမီးၸႂ်မိၵ်ႉသႃတိၵ်ႉထိလႆႈ ၽြႃးပဵၼ်ၸဝ်ႈ ပႆၼိူဝ်ၼမ်ႉ မိၼ်ၼိူဝ်လူမ်း လမ် လိၼ် လႆႈ ၽြႃးပဵၼ်ၸဝ်ႈၶိုၼ်းၵႂႃႇတီႈမိူင်းၽီ မိူင်းသၢင်လႆႈ ၵႂႃႇမိူင်း ငရၢႆးလႆႈ ၵူၺ်းၵႃႈယင်းတိုၵ်ႉမီးဢၼ်ၽြႃးပဵၼ်ၸဝ်ႈႁဵတ်းဢမ်ႇလႆႈယူႇတၢင်းၼမ် ။

 

လွင်ႈဢၼ်ၽြႃးပဵၼ်ၸဝ်ႈႁဵတ်းဢမ်ႇလႆႈၼၼ်ႉ

ၽြႃးပဵၼ်ၸဝ်ႈ ဢမ်ႇမေးၵျူဝ်ႇမေးၵိင်းပၼ်ၽႂ်လႆႈ ၽြႃးပဵၼ်ၸဝ်ႈ  ဢမ်ႇ မေးၵၢမ်ႇႁၢႆႉၵၢမ်ႇလီပၼ်ၽႂ်လႆႈ ၽြႃးပဵၼ်ၸဝ်ႈဢမ်ႇၶၢႆႉလုၵ်ႈလိူၼ် လုၵ်ႈလၢဝ် လႆႈ ၽြႃးပဵၼ်ၸဝ်ႈ ဢမ်ႇၸွႆႈႁႂ်ႈၵူၼ်းမၢၵ်ႈမီးလီပဵၼ်လႆႈ ၽြႃးပဵၼ်ၸဝ်ႈ ဢမ်ႇ ႁဵတ်း ႁႂ်ႈၵူၼ်းတၢင်းလၢႆၵွတ်းၽၢၼ်လႆႈ

ၵူၺ်းၵႃႈလွင်ႈ ဢၼ်ၽြႃးပဵၼ်ၸဝ်ႈႁဵတ်းဢမ်ႇလႆႈၼႆႉသမ်ႉမီးၵူၼ်းမၢင်ၸိူဝ်းၶဝ်သမ်ႉႁဵတ်းလႆႈဝႃႈၼႆ ၵူၼ်းၸိူဝ်းဢၼ်ဝႃႈႁဵတ်းလႆႈၸိူဝ်းၼၼ်ႉမီးမိူၼ်ၼင်ႇ မေႃလူ  မေႃတႂၵ်ႈ  မေႃတူၺ်းပေႇတၢင်ႇၵႃႇလႃး   မေႃၽီ ၸႃႉၸိူဝ်းၼႆႉယဝ်ႉ။

 

ဢၼ်ႁဝ်းထုၵ်ႇလီမီးၼၼ်ႉပဵၼ်သတိပၺ်ႇၺႃႇတေဢမ်ႇၸၢင်ႈယုမ်ႇၽိတ်း

ပၺ်ႇၺႃႇသမ်ပထႃ ပဵၼ်ၽူႈမီးပၺ်ႇၺႃႇ မီးပၺ်ႇၺႃႇႁႂ်ႈၶဝ်ႈ ထိုင်ၼႂ်း သၸ်ၸႃႇလွင်ႈၵိူတ်ႈလွင်ႈတၢႆ ဢၼ်ဢမ်ႇသုတ်းသဵင်ႈလႆႈ ပဵၼ်ၶိူင်ႈ ၸီး တႅင်း ၵိလေႇသႃႇ တၢင်းလၢႆပဵၼ်ၶိူင်ႈႁဵတ်းႁႂ်ႈ သုတ်းသဵင်ႈ လွင်ႈတုၵ်ႉၶလႆႈ။