ဢရိယမၵ်ႈၵၢင်ႇပႅတ်ႇပႃး

 

ဢရိယမၵ်ႈၵၢင်ႇပႅတ်ႇပႃး

 

ၽိၵ်ၶူတၢင်းလၢႆ ! ဢရိယသၸ်ၸႃႇ ပဵၼ်ႁူၼ်တၢင်းႁႂ်ႈထိုင်လွင်ႈမွတ်ႇဢမ်ႇလိူဝ်ၶွင်တုၵ်ႉ   ပဵၼ်ၸိူင်ႉႁိုဝ် ? ပဵၼ်ႁူၼ်တၢင်း မၢၵ်ႈၵၢင်ႈပႅတ်ႇပႃးဢၼ်သုတ်းတွၼ်ႉၼႆႉလႄႈ

 

ပႅတ်ႈပိူင်ပဵၼ်

႑ သမ်မႃတိတ်ထိ      လွင်ႈႁၼ်ထုၵ်ႇမႅၼ်ႈ

႒ သမ်မႃသင်ၵပ      လွင်ႈဝူၼ်ႉထုၵ်ႇမႅၼ်ႈ

႓ သမ်မႃဝႃၸႃ         လွင်ႈလၢတ်ႈၸႃထုၵ်ႇမႅၼ်ႈ

႔ သမ်မႃၵမၼ်တ    လွင်ႈႁဵတ်းသၢင်ႈထုၵ်ႇမႅၼ်ႈ

႕ သမ်မႃဢႃၸီဝ      လွင်ႈႁႃလဵင်ႉတွင်ႉထုၵ်ႇမႅၼ်ႈ

႖ သမ်မႃဝႃယႃမ       လွင်ႈၵျၢင်ႉၵမ်ထုၵ်ႇမႅၼ်ႈ

႗ သမ်မႃသတိ          လွင်ႈၶုၵ်ႉၶူၼ်ႉထုၵ်ႇမႅၼ်ႈ

႘ သမ်မႃသမ်မႃထိ    လွင်ႈတင်ႇၸႂ်မၼ်ႈထုၵ်ႇမႅၼ်ႈ

 

႑ ) ၽိၵ်ၶူတၢင်းလၢႆ ! လွင်ႈႁၼ်ထုၵ်ႇမႅၼ်ပဵၼ်ၸိူင်ႉႁိုဝ် ?

ၽိၵ်ၶူတၢင်းလၢႆ ! လွင်ႈႁူႉၼႂ်းတုၵ်ႉ  လွင်ႈႁူႉၼႂ်းတၢင်းၵိူတ်ႇၶိုၼ်ႈၶွင်တုၵ်ႉ  လွင်ႈႁူႉၼႂ်းတၢင်းမွတ်ႇ ဢမ်ႇလိူဝ်ၶွင်တုၵ်ႉ လွင်ႈႁူႉၼႂ်းတၢင်းႁႂ်ႈထိုင်ၶိူင်ႈမွတ်ႇဢမ်ႇမီးလိူဝ်ၶွင်တုၵ်ႉ ဢၼ်လႂ်

ၼႆႉႁဝ်းႁွင်ႉဝႃႈ  လွင်ႈႁၼ်ထုၵ်ႇမႅၼ်ႈ ။

 

႒ ) ၽိၵ်ၶူတၢင်းလၢႆ ! လွင်ႈဝူၼ်ႉထုၵ်ႇမႅၼ်ႈပဵၼ်ၸိူင်ႉႁိုဝ် ?

ၽိၵ်ၶူတၢင်းလၢႆ ! လွင်ႈဝူၼ်ႉၼႂ်းၵၢၼ်ဢွၵ်ႉပူၼ်ႉၵၢမ်ႇ လွင်ႈဝူၼ်ႉၼႂ်ႈၵၢၼ်ဢမ်ႇၽယပၢတ်ႇမၢတ်ႈႁၢႆႉ  လွင်ႈဝူၼ်ႉၼႂ်ႈၵၢၼ်ဢမ်ႇပူၼ်ႉပႅၼ် ၼႆႉႁဝ်းႁွင်ႉဝႃႈ လွင်ႈဝူၼ်ႉထုၵ်ႇမႅၼ်ႈ ။

 

႓ ) ၽိၵ်ၶူတၢင်းလၢႆ ! လွင်ႈလၢတ်ႈၸႃထုၵ်ႇမႅၼ်ႈပဵၼ်ၸိူဝ်ႉႁိုဝ် ?

ၽိၵ်ၶူတၢင်းလၢႆ ! ဝေႈပႅတ်ႈလွင်ႈလၢတ်ႈၸႃပႅတ်ႉလႅၼ် ဝေႈပႅတ်ႈလွင်ႈလၢတ်ႈၸႃသေႃႇသေႇႁႂ်ႈ ၽူႈၵူၼ်းတႅၵ်ႇယၢႆႈၵၼ်  ဝေႇပႅတ်ႈလွင်ႈလၢတ်ႈၸႃႁိုတ်းထသဵင်ၵျၢမ်း ဝေႈပႅတ်ႈလွင်ႈလၢတ်ႈၸႃ ဢၼ်ဢမ်ႇမီးသၢၵ်ႈသေႇ ၼႆႉႁဝ်းႁွင်ႉဝႃႈ လွင်ႈလၢတ်ႈၸႃထုၵ်ႇမႅၼ်ႈ ။

 

 

 

႔ ) ၽိၵ်ၶူတၢင်းလၢႆ ! လွင်ႈႁဵတ်းသၢင်ႈထုၵ်ႇမႅၼ်ႈ ပဵၼ်ၸိူင်ႉႁိုဝ် ?

ၽိၵ်ၶူတၢင်းလၢႆ ! ငိူင်ႉဝေႈလွင်ႈၶႃႈႁႅမ်သတ်းႁႂ်ႈလူႉတၢႆ  ငိူင်ႉဝေႈလွင်ႈလၵ်ႉဢဝ်ၶူဝ်းၶွင်ဢၼ်ၸဝ်ႈ ပိူၼ်ႈဢမ်ႇပၼ် ငိူင်ႉဝေႈလွင်ႈႁဵတ်းၽိတ်းၵႃႇမေႇသုတၢင်းလၢႆ  ၼႆႉႁဝ်းႁွင်ႉဝႃႈ လွင်ႈႁဵတ်းသၢင်ႈထုၵ်ႇ မႅၼ်ႈ ။

 

႕ ) ၽိၵ်ၶူတၢင်းလၢႆ ! လွင်ႈႁႃလဵင်ႉတွင်ႉထုၵ်ႇမႅၼ်ပဵၼ်ၸိူင်ႉႁိုဝ် ?

ၽိၵ်ၶူတၢင်းလၢႆ ! ဢရိယသႃဝၵၸိူဝ်းၼႆႉ ၽႃႈဝၢင်းၵၢၼ်ႁႃလဵင်ႉတူဝ်ၸႂ်ဢၼ်ၽိတ်းသေ ဢွင်ႇမၢၼ် လွင်ႈပဵၼ်ယူႇလူၺ်ႈၵၢၼ်ႁႃလဵင်ႉတူဝ်ၸႂ်ဢၼ်ထုၵ်ႇမႅၼ်ႈ ၼႆႉႁဝ်းႁွင်ႉဝႃႈ လွင်ႈႁႃလဵင်ႉတွင်ႉ ထုၵ်ႇမႅၼ်ႈ ။

 

႖ ) ၽိၵ်ၶူတၢင်းလၢႆ ! လွင်ၵျၢင်ႉၵမ်ထုၵ်ႇမႅၼ်ပဵၼ်ၸိူင်ႉႁိုဝ် ?

ၽိၵ်ၶူတၢင်းလၢႆ ! ၽိၵ်ၶူၼႂ်းၸိူဝ်းၼႆႉ ၸိုင်မီးလွင်ပေႃးၸႂ် မီးတၢင်းၶတ်းၸႂ် မီးလွင်ႈသႂ်ႇၸႂ်ၵျၢင်ႉၵမ်  မီးလွင်ႈပၢင်ႉၸိတ်ႇၸႂ် မီးလွင်ႈတင်ႈၸႂ်ဝႆႉ ပိူဝ်ႈဢမ်ႇႁႂ်ႈၵိူတ်ႇၶိုၼ်ႈၶွင်ၵၢၼ်ဢၵုသူလ်ထမ်းတၢင်းလၢႆ ဢၼ်ပဵၼ်ဝူတ်ႈၵၢမ်ႇဢၼ်ဢမ်ႇပႆႇၵိူတ်ႇၶိုၼ်ႈယႃႇႁႂ်ႈၵိူတ်ႇၶိုၼ်ႈ

 

ၸိုင်မီးလွင်ပေႃးၸႂ် မီးတၢင်းၶတ်းၸႂ် မီးလွင်ႈသႂ်ႇၸႂ်ၵျၢင်ႉၵမ်  မီးလွင်ႈပၢင်ႉၸိတ်ႇၸႂ် မီးလွင်ႈ တင်ႈၸႂ်ဝႆႉ ပိူဝ်ႈဝၢင်းတမ်းသေၵၢၼ်ဢၵုသူလ်ထမ်းတၢင်းလၢႆ ဢၼ်ပဵၼ်ဝူတ်ႈ ၵၢမ်ႇ ဢၼ်ၵိူတ်ႇၶိုၼ်ႈယဝ်ႉ

 

ၸိုင်မီးလွင်ပေႃးၸႂ် မီးတၢင်းၶတ်းၸႂ် မီးလွင်ႈသႂ်ႇၸႂ်ၵျၢင်ႉၵမ်  မီးလွင်ႈပၢင်ႉၸိတ်ႇၸႂ် မီးလွင်ႈ တင်ႈၸႂ်ဝႆႉ ပိူဝ်ႈႁႂ်ႈၵိူတ်ႇၶိုၼ်ႈၶွင်ၵၢၼ်ၵုသူလ်ထမ်းတၢင်းလၢႆ ဢၼ်ဢမ်ႇပႆႇၵိူတ်ႇၶိုၼ်ႈ ႁႂ်ႈၵိူတ်ႇၶိုၼ်ႈ

 

 ၸိုင်မီးလွင်ပေႃးၸႂ် မီးတၢင်းၶတ်းၸႂ် မီးလွင်ႈသႂ်ႇၸႂ်ၵျၢင်ႉၵမ်  မီးလွင်ႈပၢင်ႉၸိတ်ႇၸႂ် မီးလွင်ႈ တင်ႈၸႂ်ဝႆႉပိူဝ်ႈလွင်ႈယိုၼ်းယၢဝ်း ပိူဝ်ႈဢမ်ႇလႆလိူၼ်ႈ လွင်ႈငွၵ်ႈငၢမ်းယိုင်ႈၶိုၼ်ႈ လွင်ႈတဵမ်ဢိမ်ႇ လွင်ႈႁိူဝ်ႈႁိူင်း လွင်ႈတဵမ်ထူၼ်ႈ ၶွင်ၵုသူလ်ထမ်းတၢင်းလၢႆ ဢၼ်ၵိူတ်ႇၶိုၼ်ႈယဝ်ႉ

ၼႆႉႁဝ်းႁွင်ႉဝႃႈ လွင်ႈၵျၢင်ႉၵမ်ထုၵ်ႇမႅၼ်ႈ ။

 

႗ ) ၽိၵ်ၶူတၢင်းလၢႆ ! လွင်ႈၶုၵ်းၶူၼ်ႉပဵၼ်ၸိူင်ႉႁိုဝ် ?

ၽိၵ်ၶူတၢင်းလၢႆ ! ၽိၵ်ၶူၼႂ်းၸိူဝ်းၼႆႉ ပဵၼ်ၽူႈမီး ပၵတိ ၶူၼ်ႉႁၼ်တူဝ်ၵႃႇယၼႂ်းၵႃႇယယူႇ  မီးလွင်ႈ သႂ်ႇၸႂ်ၵျၢင်ႉၵမ်ၽဝ်ပႅတ်ႈၵိလေႇသႃႇ မီးလွင်ႈႁူႉတိုၼ်ႇတူဝ်တူဝ်ႈၽွမ်ႉ မီးသတိ ၼမ်းလွင်ႈပေႃးၸႂ် လႄႈ လွင်ႈဢမ်ႇပေႃးၸႂ်ၼႂ်းလေႃးၵဢွၵ်ႇသေလႆႈ

ပဵၼ်ၽူႈမီး ပၵတိ ၶူၼ်ႉႁၼ် ဝေႇတၼႃႇ ၼႂ်းဝေႇတၼႃႇယူႇ  မီးလွင်ႈ သႂ်ႇၸႂ်ၵျၢင်ႉၵမ်ၽဝ် ပႅတ်ႈၵိလေႇသႃႇ မီးလွင်ႈႁူႉတိုၼ်ႇတူဝ်တူဝ်ႈၽွမ်ႉ မီးသတိ ၼမ်းလွင်ႈပေႃးၸႂ် လႄႈ လွင်ႈ ဢမ်ႇပေႃးၸႂ်ၼႂ်းလေႃးၵဢွၵ်ႇသေလႆႈ

 

ပဵၼ်ၽူႈမီး ပၵတိ ၶူၼ်ႉႁၼ် ၸႂ်ၼႂ်းၸႂ်ယူႇ  မီးလွင်ႈသႂ်ႇၸႂ်ၵျၢင်ႉၵမ်ၽဝ်ပႅတ်ႈၵိလေႇသႃႇ မီးလွင်ႈႁူႉတိုၼ်ႇတူဝ်တူဝ်ႈၽွမ်ႉ မီးသတိ ၼမ်းလွင်ႈပေႃးၸႂ် လႄႈ လွင်ႈဢမ်ႇပေႃးၸႂ် ၼႂ်းလေႃးၵဢွၵ်ႇသေလႆႈ

 

ပဵၼ်ၽူႈမီး ပၵတိ ၶူၼ်ႉႁၼ် ထမ်းၼႂ်းထမ်းယူႇ မီးလွင်ႈ သႂ်ႇၸႂ်ၵျၢင်ႉၵမ်ၽဝ်ပႅတ်ႈၵိလေႇသႃႇ မီးလွင်ႈႁူႉတိုၼ်ႇတူဝ်တူဝ်ႈၽွမ်ႉ မီးသတိ ၼမ်းလွင်ႈပေႃးၸႂ် လႄႈ လွင်ႈဢမ်ႇပေႃးၸႂ် ၼႂ်း လေႃးၵဢွၵ်ႇသေလႆႈ ၼႆႉႁဝ်းႁွင်ႉဝႃႈ လွင်ႈၶုၵ်းၶူၼ်ႉထုၵ်ႇမႅၼ်ႈ ။

 

႘ ) ၽိၵ်ၶူတၢင်းလၢႆ ! လွင်ႈတင်ႈၸႂ်မၼ်ႈထုၵ်ႇမႅၼ်ႈပဵၼ်ၸိူင်ႉႁိုဝ် ?

ၽိၵ်ၶူတၢင်းလၢႆ ! ၽိၵ်ၶူၼႂ်းၸိူဝ်းၼႆႉ ၼိမ်ယဵၼ်ယဝ်ႉၼႂ်းၵၢမ်ႇတၢင်းလၢႆ  ၼိမ်ယဵၼ်ယဝ်ႉ ၼႂ်းဢၵုသူလ်ထမ်းတၢင်းလၢႆ  ၶဝ်ႈထိုင်သၢၼ်ႇထိၼိုင်ႈ ဢၼ်မီးဝိတုၵ ဝိၸရ (လွင်ႈဝူၼ်ႉ ၼႂ်းတၢင်းၽၢႆႇၵုသူလ်) မီးပီတီ လႄႈ သုၶ ဢၼ်ၵိူတ်ႇၶိုၼ်ႈသေယဵၼ်ဝႆႉယဝ်ႉလႄယူႇ

 

ၵွပ်ႈဝိတုၵ ဝိၸႃရ ၸၢင်ႁၢႆၵႂႃႇသေ ၸင်ႇၶဝ်ႈထိုင်သၢၼ်ႇထိသွင်  ပဵၼ်ၶိူင်ႈၽွင်ႇသႂ်ၶွင်ၸႂ် ၼႂ်းၽၢႆႇၼႂ်း ႁႂ်ႈသမ်မႃထိပဵၼ်ထမ်းဢၼ်ဢဵၵ်ႇၽုတ်းၶိုၼ်ႈ ဢမ်ႇမီးဝိတုၵ ဢမ်ႇမီးဝိၸႃရ ၵူၺ်းမီးပီတီ လႄႈ သုၶ ဢၼ်ၵိူတ်ႇၶိုၼ်ႈပဵၼ်သမ်မႃထိယဝ်ႉလႄယူႇ

 

ၵွပ်ႈပီတီၸၢင်ႁၢႆၵႂႃႇ ၸိုင်ပဵၼ်ၽူႈဢမ်ႇပႃးၸႂ်လွင်ႈသင်ယူႇလႆႈ မီးသတိ မီးလွင်ႈတိုၼ်ႈတူဝ် တူဝ်ႈၽွမ်ႉ လႄႈလႆႈၸၢမ်ႇတၢင်းသိူဝ်းလူၺ်ႈတူဝ်ၵႃႇယ  ၸင်ႇၶဝ်ႈထိုင်သၢၼ်ႇထိသၢမ် ဢၼ် ပဵၼ်သၢၼ်ႇဢရိယၸဝ်ႈတၢင်းလၢႆၶဝ်ယွင်ႈယေႃးၽူႈၶဝ်ႈထိုင်သၢၼ်ႇၼႆႉဝႃႈ ပဵၼ်ၽူၼိမ်ယူႇလႆႈ မီးသတိ မီးလွင်ႈယူႇပဵၼ်ပၵတိသုၶ (သိူဝ်း) ယဝ်လႄယူႇ

 

ၵွပ်ႈဝၢင်းတုၵ်ႉ လႄႈ သိူဝ်း လႆႈသေ လႄႈ ၵွပ်ႈလွင်ႈမွတ်ႇႁၢႆၵႂႃႇၶွင်သေႃးမၼသ် လႄႈ ထေႃးမၼသ် ၼႂ်းၵၢလ်ၵွၼ်ႇ ၸင်ႇၶဝ်ႈထိုင်သၢၼ်ႇထိသီႇ  ဢၼ်ဢမ်ႇတုၵ်ႉ လႄႈ ဢမ်ႇသိူဝ်း ၵူၺ်းမီးသတိဢၼ် ၸိုၼ်ႈသႂ်ယူ ၵွပ်ႈမီးဢုပိၵ်ၶႃ ယဝ်ႉလႄယူႇ  ၼႆႉႁဝ်းႁွင်ႉဝႃႈလွင်ႈတင်ႈၸႂ်မၼ်ႈထုၵ်ႇမႅၼ်ႈ ။

 

ၽိၵ်ၶူတၢင်းလၢႆ ! ၸိူဝ်းၼႆႉလႄႈ ႁွင်ႉဝႃႈဢရိယသၸ်ၸႃႇ ႁူၼ်တၢင်းပဵၼ်ၶိူင်ႈႁႂ်ႈထိုင် လွင်ႈမွတ်ႇဢမ်ႇလိူဝ်ၶွင်တုၵ်ႉ ။

 

 

 

ဢိင်ၶေႃႈမုလ်းပီတၵတ်ႈၽၢႆႇထႆး

မႁႃႇဝၵ တီႇၵၼိၵယ။

-ပႃႇလိမႁႃႇ တီႊ 10/343-345/299။

 

Read More

ဢိင်ၵူလီမႃႇလသုတ်တ (တွၼ်ႈၶျွတ်ႈၼၢင်းယိင်းပႃးတွင်ႉ)

 

ဢိင်ၵူလီမႃႇလသုတ်တ (တွၼ်ႈၶျွတ်ႈၼၢင်းယိင်းပႃးတွင်ႉ)

 

ပွၵ်ႈၼိုင်ႈ ပဵၼ်ၶၢဝ်းယၢမ်းၸဝ်ႉ ၸဝ်ႈဢိင်ႇၵုလိမႃလ မီးတင်းဢၼ်တရႃဝသၵယဝ်ႉ ဢဝ်တင်းသပိတ်ႈသၢင်ႇၵၢၼ်း ၶဝ်ႈၵႂႃႇၶၢမ်ႇသွမ်းၼႂ်းမိူင်းသႃဝတ်ထိ တိုၵ်ႉဢွၵ်ႇၶၢမ်ႇသွမ်းယူႇတီႈၼႂ်းမိူင်းသႃဝတ်ထိ လႆႈႁၼ်ၼၢင်းယိင်းၵေႃႉ ၼိုင်ႈ ပႃးတွင်ႉယႂ်ႇယဝ်ႉ ၸင်ႇမီးတၢင်းဝူၼ်ႉဝႃႈ သတ်းတၢင်းလၢႆ မီးတၢင်းသဝ်ႈမွင်ၼေႃ သတ်းတၢင်းလၢႆမီးတၢင်းသဝ်ႈမွင်  ၼေႃ ၼင်ႇၼႆ

 

ပေႃးယဝ်ႉၸဝ်ႈဢိင်ႇၵူလိမႃႇလ ၸင်ႇဢွၵ်ႇၶၢမ်ႇသွမ်း ၼႂ်းမိူင်သႃဝတ်ထိ ၼႂ်းယၢမ်းပၸ်သႃၽတ်းသေပွၵ်ႈၶိုၼ်းယဝ်ႉ ၶဝ်ႈၵႂႃႇႁႃၽြႃးပဵၼ်ၸဝ်ႈထိုင်တီႈယူႇ ၶုပ်ႉၵွမ်းၼွမ်းဝႆႈၽြႃးပဵၼ်ၸဝ်ႈယဝ်ႉ ၼင်ႈတီႈၽၢႆႇၶၢင်ႈၼိုင်ႈ ပေႃးယဝ်ႉၸင်ႇ တၢင်ႇထိုင်ၽြႃးပဵၼ်ၸဝ်ႈဝႃႈ ၽြႃးပဵၼ်ၸဝ်ႈတီႈၶႃႈ ယွၼ်းၽွလ်းတိုဝ်ႉတၢင်း ယၢမ်းၸဝ်ႉၼႆႉ ၶႃႈၽူႈၸဝ်ႈ မီးတင်း ဢၼ်တရႃဝသၵယဝ်ႉ ဢဝ်တင်းသပိတ်ႈသၢင်ႇၵၢၼ်း ၶဝ်ႈၵႂႃႇၶၢမ်ႇသွမ်းၼႂ်းမိူင်းသႃဝတ်ထိ တိုၵ်ႉဢွၵ်ႇၶၢမ်ႇသွမ်းယူႇတီႈ ၼႂ်းမိူင်းသႃဝတ်ထိ တိုၵ်ႉဢွၵ်ႇၶၢမ်ႇသွမ်းယူႇၸွမ်းၵိဝ်ႇတၢင်းၼႂ်းမိူင်းသႃဝတ်ထိ လႆႈႁၼ်ၼၢင်းယိင်း ၵေႃႉၼိုင်ႈပႃး တွင်ႉယႂ်ႇယဝ်ႉ  ယဝ်ႉၸင်ႇမီးတၢင်းဝူၼ်ႉဝႃႈ သတ်းတၢင်းလၢႆသဝ်ႈမွင်ၼေႃ သတ်းတၢင်းလၢႆသဝ်ႈမွင်ၼေႃ ၼင်ႇၼႆၸဝ်ႈၶႃႈ ။

 

ၽြႃးပဵၼ်ၸဝ်ႈၸင်ႇလၢတ်ႈဝႃႈ တူၺ်းလူ ဢိင်ႇၵူလိမႃလ ၸဝ်ႈၸိုင်ၶဝ်ႈၵႂႃႇႁႃၼၢင်းယိင်းၼၼ်ႉ လႄႈ ၵၢဝ်ႇလၢတ်ႈတီႈ ၼၢင်း ယိင်းၼၼ်ႉ ၼင်ႇၼႆဝႃႈ တူၺ်းလူ ၼွင်ႉယိင်း တင်ႈတေႇႁဝ်းၵိူတ်ႇမႃးယဝ်ႉ လႆႈႁူႉထိုင်ဝႃႈလွင်ႈၶႃႈသတ်း ဢမ်ႇႁႂ်ႈ မီးသၢႆၸႂ် လူၺ်ႈသၸ်ႉၸႃႇဝႃၸႃၼႆႉ ယွၼ်းႁႂ်ႈၼၢင်းမီးတၢင်းသိူဝ်းသေၵမ်း ယွၼ်းႁႂ်ႈတၢင်းသိူဝ်းမီးတေႃႇတွင်ႉၶွင် ၼၢင်းသေ ၵမ်း

 

ဢိင်ႇၵူလိမႃလၸၢင်ႇတၢင်ႇလဝ်ႈဝႃႈ ၽြႃးပဵၼ်ၸဝ်ႈၶႃႈ လွင်ႈၸိူင်ႉၼၼ် တေပဵၼ်လွင်ႈတီႈၶႃႈၽူႈၸဝ်ႈလၢတ်ႈပႅတ်ႉ လႅၼ်ႁိုဝ်  ၵွပ်ႈၶႃႈၽူႈၸဝ်ႈၶႃႈႁႅမ်သတ်းႁႂ်ႈသုတ်းသဵင်ႈသၢႆၸႂ် တၢင်းၼမ်  တူၺ်းလူ ဢိင်ၵူလိမႃလ ပေႃးၸိူင်ႉၼၼ် ၸဝ်ႈၸိုင်ၶဝ်ႈၵႂႃႇႁႃၼၢင်းယိင်းၼၼ်ႉ လႄႈ ၵၢဝ်ႇလၢတ်ႈတီႈၼၢင်း ယိင်းၼၼ်ႉ ၼင်ႇ ၼႆဝႃႈ တူၺ်းလူ ၼွင်ႉယိင်း တင်ႈတေႇႁဝ်းၵိူတ်ႇယဝ်ႉၼႂ်းဢရိယၸႃႇတိ(ၸၢတ်ႈ) လႆႈႁူႉထိုင်ဝႃႈ လွင်ႈၶႃႈႁႅမ်သတ်းဢမ်ႇႁႂ်ႈမီးသၢႆၸႂ် ဢမ်ႇမီးယဝ်ႉ လူၺ်ႈသၸ်ႉၸႃႇဝႃၸႃၼႆႉ ယွၼ်းႁႂ်ႈမီးတၢင်းသိူဝ်းသေၵမ်း ယွၼ်းႁႂ်ႈတၢင်းသိူဝ်းမီးတေႃႇတွင်ႉ ၶွင်ၼၢင်းသေၵမ်း

ၸဝ်ႈဢိင်ႇၵူလိမႃလၸင်ႇႁပ်ႉဢဝ်ၶေႃႈၵႂၢမ်းၼၼ်ႉယဝ်ႉသေ  ၸင်ႇၶဝ်ႈၵႂႃႇႁႃတီႈၼၢင်းယိင်း ၼၼ်ႉထိုင်တီႈယူႇ

 

သေလႆႈၵၢဝ်ႇလၢတ်ႈတီႈ ၼၢင်းယိင်းၼၼ်ႉၼင်ႇၼႆဝႃႈ တူၺ်းလူၼွင်ႉယိင်း တင်ႈတေႇႁဝ်းလႆႈၵိူတ်ႇယဝ်ႉၼႂ်း ဢရိယၸႃႇတိ လွင်ႈ ၶႃႈႁႅမ်သတ်းႁႂ်ႈသုတ်းသဵင်ႈသၢႆၸႂ်ဢမ်ႇလႆႈမီးယဝ်ႉ  လူၺ်ႈသၸ်ႉၸႃႇဝႃၸႃၼႆႉ ယွၼ်းႁႂ်ႈမီးတၢင်း သိူဝ်းသေၵမ်း ယွၼ်းႁႂ်ႈတၢင်းသိူဝ်းမီးတေႃႇတွင်ႉၶွင်ၼၢင်းသေၵမ်း  ယၢမ်းၼၼ်ႉ တၢင်းသိူဝ်းၸင်ႇလႆႈမီးတေႃႇၼၢင်း တၢင်းသိူဝ်းလႆႈမီးတေႃႇတွင်ႉၶွင်ၼၢင်းယဝ်ႉ ၸဝ်ႈဢိင်ႇၵူလိမႃလ ၸင်ႇလႆႈႁူႉ ၸႅင်ႈထမ်းပဵၼ်ၸဝ်ႈဢရႁံတႃ

ယၢမ်းၼၼ် ၸဝ်ႈဢိင်ၵူလိမႃလ ၸိုင်ဢွၵ်ႇၼႂ်းမူႇ ယူႇၽူႈလဵဝ် ပဵၼ်ၽူႈဢမ်ႇလူင်လိုမ်း သႂ်ႇၸႂ်လွင်ႈ ၵျၢင်ႉၵမ်ႉ မီးတူဝ်ဢၼ်သူင်ႇ ၵႂႃႇယဝ်ႉ ယူႇဢမ်ႇႁိုင်သင်ၵေႃႈႁဵတ်းႁႂ်ႈၸႅင်ႈထိုင်တီႈသုတ်းၽရူမ်မၸၺ်

 

ဢၼ်ဢမ်ႇမီးထမ်းတၢင်ႇပိူင်ပဵင်းလႆႈ ဢၼ်ၵုလ်ပုတ်ႇ တၢင်းလၢႆဢွၵ်ႇယၢၼ်ႁိူၼ်းႁေႃ ႁဵတ်းပဵၼ်သႃမၼ ပိူဝ်ႈပၺ်ႇၺႃႇဢၼ်သုတ်းတွၼ်း ၼႂ်းယၢမ်းၼႆႉ လႄႈၶဝ်ႈထိုင်ယူႇ လႆႈႁူႉသတ်ႉ ၸႅင်ႈယဝ်ႉဝႃႈ ၸၢတ်ႈသဵင်ႈယဝ်ႉ ၽရူမ်မၸၺ်ယူႇသုတ်းယဝ်ႉ ၼႃႈၵၢၼ်ဢၼ်လူဝ်ႇႁဵတ်းၵေႃႈႁဵတ်းယဝ်ႉတူဝ်ႈယဝ်ႉ ၵၢၼ်တၢင်ႇပိူင် ပ်ူဝ်ႈပဵၼ်ၸိူင်ႉ ၼႆဢမ်ႇလႆႈမီးထႅင်ႈယဝ်ႉ ၼင်ႇၼႆ ၵေႃႈၸဝ်ႈဢိင်ႇၵူလိမႃလလႆႈပဵၼ်ၸဝ်ဢရႁံတႃတူၼ်ၼိုင်ႈၼႂ်း ၸဝ်ႈ ဢရႁံတႃတၢင်းလၢႆ ။

 

ပွၵ်ႈၼၼ်ႉ ယၢမ်းၸဝ်ႉ ၸဝ်ႈဢိင်ၵုလိမႃလ ၼုင်ႈယဝ်ႉ မီးတင်းသပိတ်ႈလႄႈသၢင်ႇၵၢၼ်း ၶဝ်ႈၵႂႃႇၶၢမ်ႇသွမ်းၼႂ်းမိူင်းသႃဝတ်ထိ  ၶၢဝ်းယၢမ်းၼၼ်ႉ ၵွၼ်ႈလိၼ် ပွတ်းမႆႉ ၵွၼ်ႈႁိၼ် ဢၼ်ၵူၼ်းတၢင်းလၢႆ

ၽၢတ်ႇသႂ်ႇၵေႃႈမႃးတူၵ်းသႂ်ႇတီႈတူဝ်ၸဝ်ႈဢိင်ၵုလိမႃလ ၸဝ်ႈဢိင်ၵုလိမႃလ ႁူဝ်တႅၵ်ႇ လိူတ်ႈလႆ သပိတ်ႈၵေႃႈတႅၵ်ႇ ၽႃႈသင်ၶတိၵေႃႈသိၵ်ႇၶၢတ်ႇ ၶဝ်ႈမိူဝ်းၸူးၽြႃးပဵၼ်ၸဝ်ႈထိုင်တီႈယူႇ ၽြႃးပဵၼ်ၸဝ်ႈလႆႈႁၼ် ၸဝ်ႈဢိင်ၵုလိမႃလတိုၵ်ႉပႆၶဝ်ႈမႃးယူႇ ပေႃးယဝ်ႉၸင်ႇလၢတ်ႈတီႈၸဝ်ႈဢိင်ၵုလိမႃလဝႃႈ ၸဝ်ႈၸိုင်ယိူၼ်ႉၵၼ်ႉဝႆႉသေၵမ်း ၽရၢမ်း ၸဝ်ႈၸိုင်ယိူၼ်ႉၵၼ်ႈဝႆႉသေၵမ်း ၽရၢမ်း ၸဝ်ႈလႆႈၶၢမ်ႇၽွလ်းၶွင်ၵၢမ်ႇဢၼ်ပဵၼ်လွင်ႈတၢင်းတေႁဵတ်းႁႂ်ႈၸဝ်ႈမူၵ်ႇမႆႈယူႇၼႂ်းငရၢႆးၶၢဝ်းတၢင်းလၢႆပီႊ ၶၢဝ်းတၢင်းလၢႆပၢၵ်ႇပီႊ ၶၢဝ်းတၢင်းလၢႆႁဵင်ပီႊ ၼႂ်းပၸုပၺ်ႇယၢမ်းလဵဝ်ၼႆႉၼၼ်ႉၵူၺ်း ၸဝ်ႈဢိင်ၵုလိမႃလၸိုင်ႁွင်ႉၶၢင်း ။

ပွၵ်ႈၼၼ်ႉၸဝ်ႈဢိင်ၵုလိမႃလ ၸင်ႇၵႂႃႇၼႂ်းတီႈလပ်ႉလဵၼ်ႉ ယူႇၸၢမ်ႇဝိမုတိသုၶ ၸင်ႇၶႆႈၸႂ်ၼႂ်းယၢမ်းၼၼ်ႉဝႃႈ  ၽူႈလႂ်မိူဝ်ႈၵွၼ်ႇလူင်လိုမ်း ၽၢႆႇလင်ၽူႈၼၼ်ႉဢမ်ႇလူင်လိုမ်း ၶဝ်ၸင်ႇႁဵတ်းႁႂ်ႈလုၵ်ႈလေႃးၵၼႆႉႁိူဝ်ႈလႅင်းၼင်ႇလုၵ်ႈလိူၼ် ပူၼ်ႉလွတ်ႈမွၵ်ႇၵုမ်ႈပင်းႁေႉ

ၸိူင်ႉၼၼ် ၽူႈလႂ်ႁဵတ်းသၢင်ႈၵၢမ်ႇဢၼ်ပဵၼ်ဝူတ်ႈတၢမ်ႇယဝ်ႉ ၸင်ႇပိၵ်ႉဢိုတ်းလႆႈသေလူၺ်ႈၵုသူလ်ႇ ၽူႈၼၼ်ႉၸင်ႇႁဵတ်းႁႂ်ႈလုၵ်ႈလေႃးၵ ၼႆႉႁိူဝ်ႈလႅင်းမိူၼ်ၼင်ႇလုၵ်ႈလိူၼ်လွတ်ႈမွၵ်ႇၵုမ်ႈပင်းႁေႉ

ၸိူင်ႉၼၼ် ၽိၵ်ၶူလႂ်လႄႈ ယင်းတိုၵ်ႉပဵၼ်ၼုမ်ႇ ၸင်ႇၶူၼ်ႉၶႂႃႉၼႂ်းပုတ်ထသႃသၼႃႇ ၽိၵ်ၶူၼၼ်ႉ ၸင်ႇႁဵတ်းႁႂ်ႈလုၵ်ႈလေႃးၵ ၼႆႉႁိူဝ်ႈလႅင်းမိူၼ်ၼင်ႇလုၵ်ႈလိူၼ်လွတ်ႈယဝ်ႉမွၵ်ႇၵုမ်ႈ

ၵႃထႃသေၵမ်း  ယွၼ်းႁႂ်ၽူႈၶဵၼ်တၢင်းလၢႆၶွင်ႁဝ်းၶူၼ်ႉၶႂႃႉၼႂ်း ပုတ်ထသႃသၼႃ သေၵမ်း ယွၼ်းႁႂ်ႈမၼုသတၢင်းလၢႆဢၼ်ပဵၼ်ၽူႈၶဵၼ်ၶွင်ႁဝ်း ၸိုင်ၸမ်ၸႂ်သပ်ပုရုသ်ၽူႈၸူဝ်းႁွင်ႉၵျၢင်ႉၵမ် ထမ်းၵၼ်သေၵမ်း ႁႂ်ႈၵပ်းသိုပ်ႇၸွမ်းလွင်ႈ ၽွင်ႇၽႅဝ်ႉ ဢၼ်ပဵၼ်လွင်ႈ ၶၼ်တိ (ယိူၼ်ႉၵၼ်ႈ)လွင်ႈယွင်ႈယေႃး ဢၼ်ပဵၼ် မဵတ်ႉတႃႇသေၵမ်း

ယွၼ်းႁႂ်ႈထွမ်ႇထမ်ႇမၸွမ်းၶၢဝ်းယၢမ်းၵႃလ လႄႈ ႁဵတ်းၸွမ်းထမ်ၼၼ်ႉသေၵမ်း ၽူႈဢၼ်ပဵၼ်ၶဵၼ်ၼၼ်ႉ ဢမ်ႇထုၵ်ႇလီပူၼ်ႉပႅၼ်ႁဝ်း ႁိုဝ် ၽႂ်ၽႂ် ၸိူဝ်းၼၼ်ႉ  ၽူႈထိုင်လွင်ႈၼိမ်ယဵၼ်ယဝ်ႉ ၵႅတ်ႇၶႄပၼ် တူဝ်သတ်း ဢၼ်တူၵ်းၸႂ် လႄႈ ဢၼ်ၼိမ်သဝ်း ၼမ်ႉၸိုင်ၸၵ်ႉၼမ်ႉၵႂႃႇလႆႈ ၸၢင်ႈပိုၼ်ၵၢင်ႇၸိုင်လတ်းပိုၼ်ၵၢင်ႇလႆႈ ၸင်ႈထၢၵ်ႇၸိုင်ထၢၵ်ႇမႆႉလႆႈ ၸိူင်ႉၼႆ ၽူႈႁူတၢင်းလၢႆ ၸိုင်မိပ်ႇငႅၼ်းတူဝ်ၵဝ်ႇလႆႈၸိူင်ႉၼၼ်  ၵူၼ်းမၢင်ၸိူဝ်းၶဝ်ၽိုၵ်းသတ်းလူၺ်ႈၶွၼ်ႉၽွင်ႈ ၶေႃၽွင်ႈ သေႈၽွင်ႈ ႁဝ်းပဵၼ်ၽူႈဢၼ်ၽြႃးပဵၼ်ၸဝ်ႈၽိုၵ်းယဝ်ႉလူၺ်ႈဢမ်ႇလူဝ်ႇၸႂ်ႉဢႃယႃ ဢမ်ႇလူဝ်ႇၸႂ်ႉသတ်တရႃ

မိူဝ်ႈၵွၼ်ႇႁဝ်းမီးၸိုဝ်ႈဝႃႈ ဢႁိင်သၵ ၵူၺ်းယင်းပူၼ်ႉပႅၼ်သတ်းယူႇ  မိူဝ်ႈၼႆႉႁဝ်းမီးၸိုဝ်ႈမၢၼ်ႇမႅၼ်ႈယဝ်ႉ ႁဝ်းဢမ်ႇပူၼ်ႉ ပႅၼ်ၽႂ်ၽႂ်ယဝ်ႉ

မိူဝ်ႈၵွၼ်ႇ ႁဝ်းပဵၼ်ၸူၼ် ႁွင်ႉၸိုဝ်ႈဝႃႈ ဢိင်ၵုလိမႃလ ထုၵ်ႇၵိလေႇသႃႇၼင်ႇၵဵၼ်ၼမ်ႉယႂ်ႇၽတ်ႉၵႂႃႇ မႃးထိုင်ၽြႃးပုတ်ႉထၸဝ်ႈပဵၼ် သႃရၼယဝ်ႉ

မိူဝ်ႈၵွၼ်ႇႁဝ်းမီးမိုဝ်းၵူဝ်ႈလိူတ်ႈ မီးၸိုဝ်ႈဝႃႈ ဢိင်ၵူလိမႃလ ထိုင်ၽြႃးပုတ်ႉထၸဝ်ႈပဵၼ်သႃရၼ ၸိုင်ထွၼ်တၼ်ႁႃ ဢၼ်ဢွၼ် ၵႂႃႇၸူးၽဝလႆႈသေ  ႁဝ်းႁဵတ်းသၢင်ႈၵၢမ်ႇဢၼ်တေႁႂ်ႈထိုင်တုၶတိၸိူင်ႉၼၼ်ဝႆႉၼမ် ဢၼ်ဝိပၢၵ်ႇၶွင်ၵၢမ်ႇၸွမ်းမႃးယဝ်ႉ ႁဝ်းပဵၼ်ၽူႈဢမ်ႇမီးၼီႈ ၸႂ်ႉၽေႃးသၼ

ၸုမ်းၸိူဝ်းဢၼ်ပၺ်ႇၺႃႇတႅမ်ႇယေႃႈ ၸင်ႇႁဵတ်းသၢင်ႈၸွမ်းလွင်ႈလူင်လိုမ်းၽူႈမီးပၺ်ႇၺႃႇတၢင်းလၢႆၸိုင်လုမ်းလႃးၸိတ်ႇ ၸႂ်ဢမ်ႇႁႂ်ႈမီးလွင်ႈလူင်လိုမ်း မိူၼ်ၶူဝ်းၶွင်ၸၼ်ႉလီၼင်ႇၼၼ်

သူတၢင်းလၢႆယႃႇႁဵတ်းသၢင်ႈၸွမ်းလွင်ႈလူင်လိုမ်း ယႃႇပေၸွမ်းၸႂ် လႄႈ မီးတၢင်းသိူဝ်းၸႂ် ၼႂ်းၵၢမ်ႇ ၵွပ်ႈဝႃႈၽူႈဢမ်ႇလူင်လိုမ်းယဝ်ႉ တင်ႈယူႇ ၸိုင်ထိုင်တၢင်းသိူဝ်းဢၼ်တဵမ်ထူၼ်ႈ လွင်ႈႁဝ်းမႃးထိုင်ၽြႃးပုတ်ႉထသႃသၼႃၼႆႉၼၼ်ႉ ပဵၼ်ၵၢၼ်မႃးလီယဝ်ႉ

ဢမ်ႇလွတ်ႈၵၢင်းသၺ်ယူတ်ႉ(သၺ်ယေႃးသ) ဢမ်ႇပဵၼ်လွင်ႈဝူၼ်ႉၽိတ်း ထမ်းမၸိူဝ်းၼၼ်ႉ မီးၽြႃးပဵၼ်ၸဝ်ႈၸႅၵ်ႇဝႆႉလီယဝ်ႉ ႁဝ်းၵေႃႈလႆႈၶဝ်ႈထိုင်ထမ်မဢၼ်သုတ်းတွၼ်းၼၼ်ႉယဝ်ႉ (ၼိပ်ပၢၼ်ႇ) လွင်ႈႁဝ်းလႆႈၶဝ်ႈထိုင်ထမ်မဢၼ်သုတ်းတွၼ်းၼႆႉၼၼ်ႉ ပဵၼ်လွင်ႈၶဝ်ႈထိုင်လီယဝ်ႉ ဢမ်ႇလွတ်ႈၵၢင်းသၺ်ယူတ်ႉ(သၺ်ယေႃးသ) ဢမ်ႇပဵၼ်လွင်ႈဝူၼ်ႉၽိတ်း ဝိၸ်ႉၸႃႇသၢမ် ႁဝ်းႁူႉၸႅင်ႈယဝ်ႉ ၵႂၢမ်းသွၼ်ၶွင်ပုတ်ႉထၽြႃးပဵၼ်ၸဝ်ႈ ႁဝ်းႁဵတ်းယဝ်ႉ ၼင်ႇၼႆ ။

 

ဢိင်ၶေႃႈမုလ်းပီတၵတ်ႈၽၢႆႇထႆး သပပ်လူင်  ၽိုၼ်မၢႆ 13 ထႅဝ် 8237-8451 ၼႃႈလိၵ်ႈ 358-367 ။

 

Read More