ဝၼ်းလီ ယၢမ်းလီ ၸွင်ႇမီး

 

ဝၼ်းလီ  ယၢမ်းလီ ၸွင်ႇမီး

 

ယၢမ်းလီ ၊ ဝၼ်းလီ ၊ လိူၼ်လီ ၊ ပီႊလီ ၸွင်ႇမီႈတႄႉၵူၼ်းတၢင်းၼမ်ၶဝ် မိူဝ်ႈတေသိုဝ်ႉလူတ်ႉသိုဝ်ႉၵႃးပေႃးၼႆ တေဢွၼ်ၵၼ်ၵႂႃႇၸူးပူႇသြႃႇမေႃတႂၵ်ႈ တူၺ်းပၼ်ၵႃႇလႃးယၢမ်းဝၼ်းလီ ဢမ်ႇလီသေၸွင်ႇၵွႆႈသိုဝ်ႉ။

 

မိူဝ်ႈသိုဝ်ႉမႃးယဝ်ႉၵေႃႈဢဝ်လူတ်ႉၵႃးၼၼ်ႉၵႂႃႇၸူးမုၼ်ၸဝ်ႈၶဝ်

ဝၼ်း ပရိၵ်ႈ မတ်ႉမႆ ပၼ်သေၸွင်ႇၵွႆႈၶီႇ။

 

ၵူၺ်းၵႃႈ ယင်းတိုၵ်ႉမီးလူတ်ႉၵႃးၽႃႇၵၼ်ၼိူဝ်သဵၼ်ႈတၢင်းၼမ်မီးလူတ်ႉ တူၵ်းလွႆ တူၵ်းႁွင်ႈ မီးလူတ်ႉၽႃႇသဝ်ၾႆးၾႃႉ တၢင်းၼမ်  မီးလႂ်လႃႇယၢမ်းလီ ဝၼ်းလီ ?

မၢဝ်ႇသၢဝ်ၶဝ် မိူဝ်ႈတေၵူပ်ႉၵူႈတေႇၼႃႈႁိူၼ်းၼၼ်ႉ ဢၼ်ၵၼ်ၵႂႃႇၸူး ပူႇသြႃႇမေႃလူတူၺ်းပၼ် ယၢမ်းလီ ဝၼ်းလီ သေၸွင်ႇၵွႆႈ ၵူပ်ႉၵူႈတေႇ ၼႃႈႁိူၼ်းၵၼ်တၢင်းသဵင်ႈ  ၵူၺ်းၵႃႈ ယင်းတိုၵ်ႉမီးပေႃႈႁၢင်ႉ ပေႃႈမၢႆႈယူႇ ယင်းတိုၵ်ႉမီး မႄႈႁၢင်ႉ မႄႈမၢႆႈ ယူႇ မီးလႂ်လႃႇ ယၢမ်းလီ ဝၼ်းလီ ?

 

ၵူၼ်းႁဵတ်းႁိူၼ်းၶဝ်ၵေႃႈမိူဝ်ႈတေႁဵတ်းႁိူၼ်းၼၼ်ႉ ဢွၼ်ၵၼ်ၵႂႃႇၸူးပူႇသြႃႇ မေႃတႂၵ်ႈ မေႃလူ တူၺ်းပၼ် ယၢမ်းလီ ဝၼ်းလီသေၸွင်ႇႁဵတ်း ႁိူၼ်း ၵူၺ်း ၵႃႈယင်းတိုၵ်ႉမီး ႁိူၼ်းၵူၼ်းၽၢၼ် ၵူၼ်းၵွတ်းယူႇ မီးလႂ်လႃႇ ဢၼ်ဝႃႈ ယၢမ်းလီ ဝၼ်းလီ ။

 

တီႈတေႉမၼ်း ယၢမ်းလီ ဝၼ်းလီ လိူၼ်လီ ပီႊလီၼၼ်ႉမီးတီႈၸႂ်ႁဝ်း ၵူၺ်း ဢမ်ႇၸႂ်ႈမီးတီႈပူႇသြႃႇမေႃတႂၵ်ႈမေႃလူ ၵေႃႉလႂ် ယၢမ်းဝၼ်းတေလီဢမ်ႇ လီၼၼ်ႉ မီးတီႈ - ၵႃႇယၵၢမ်ႇ  - ဝႃႈၸီႇၵၢမ်ႇ   - မၼေႃးၵၢမ်ႇ ႁဝ်းၼၼ်ႉၵူၺ်း ၊ ပေႃးႁဝ်းႁဵတ်းလီ လၢတ်ႈလီ ဝူၼ်ႉလီ ပတိပၢတ်ႈလီ ႁဝ်းၶႂ်ႈႁဵတ်း သင်မိူဝ်ႈလႂ်ၵေႃႈလႆႈ။

 

 

လွင်ႈၼၶၢတ်ႈလိူၼ်လၢဝ် ယၢမ်း ဝၼ်း တူဝ်ၼပ် လီဢမ်ႇလီဢမ်ႇတိူဝ်ႉၶိူၵ်ႈ ၵူၼ်းႁဝ်းလႆႈ ၊ လွင်ႈၵျူဝ်ႇပိူဝ်ႉၵျူဝ်ႇဢူၼ်ႈ လၢပ်ႈပိၵ်ႉ လူဝ်ႇတႆႈတဵၼ်း ၽုၺ်ႇ လၢပ်ႈပဵၼ်တၢင်းဝူၼ်ႉၵူၼ်းၸိူဝ်း မီးၸႂ်မိၵ်ႉသႃတိၵ်ႉထိယဝ်ႉ ၊ လွင်ႈႁႅၼ်းၽိူၼ် ႁႅၼ်းၶူး တႆႈတဵၼ်း တႆႈဢၢင်း လွႆးၶေႃႉလွႆးၵျူဝ်ႇ သိုပ်ႇၸႃႇတႃႇၶၢႆႉလိူၼ်

ၶၢႆႉလၢဝ် ၶၢႆႉၵျူဝ်ႇမႃရႃႇၼ ၸိူဝ်းၼႆႉပဵၼ်လၢႆးႁဵတ်းလၢႆႁႃၵိၼ်ၶွင်ၵူၼ်းမီး ၸႂ်မိၵ်ႉသႃတိၵ်ႉထိယဝ်ႉ ။

 

ၶတီႇတီႈသုတ်းၶွင်ၵူၼ်းၸိူဝ်းပိုင်ႈဢဝ်သြႃႇမေႃလူ သြႃႇမေႃၽီ သြႃႇမေႃတႂၵ်ႈ သြႃႇတႆႈတဵၼ်း တႆႈဢၢင်းမေးၵျူဝ်ႇမေးၵိင်း ပဵၼ်တီႈပိုင်ႈၼၼ်ႉ မိူဝ်ႈတၢႆၵႂႃႇ ယဝ်ႉ တူၵ်းငရၢႆး မိူဝ်ႈပူၼ်ႉတၢမ်ႇ တီႈ မိူင်းငရၢႆးယဝ်ႉ ၵိူတ်ႇပဵၼ်သတ်း တရိၵ်ႉသၢၼ်ႇ ယဝ်ႉၵေႃႈၵိူတ်ႇပဵၼ်ၵူၼ်းၸၼ်ႉတႅမ်ႇယဝ်ႉ

ၵွပ်ႈပိူဝ်ႈႁႃတီႈပိုင်ႈၽိတ်း ၸင်ႇလႆႈႁပ်ႉၽွၼ်းယွၼ်ႈမၼ်းယဝ်ႉ ။