ဢၵျွင်း လႄႈ ဢၵျူဝ်းလွင်ႈႁဵတ်းၽိတ်း

 

ဢၵျွင်း လႄႈ ဢၵျူဝ်းလွင်ႈႁဵတ်းၽိတ်း

 

 

ဢၵျွင်းတြႃး လွင်ႈလႆႈႁဵတ်းသၢင်ႈဝႆႉ မိူဝ်ႈဝၼ်းလင် လႄႈ ၸၢတ်ႈၵွၼ်ႇ။

ဢၵျူဝ်းတြႃး မိူဝ်ႈထိုင်ၶၢဝ်းယၢမ်းတေလႆႈႁပ်ႉဢဝ်ၶိုၼ်းတဵမ်ထူၼ်ႈ ။

ဢၵျွင်းတြႃးမိူဝ်ႈဝၼ်းလင် မိူဝ်ႈၸၢတ်ႈၵွၼ်ႇဝၼ်းလင် ဢၼ်လႆႈ ႁဵတ်း လႆႈသၢင်ႈဝႆႉၼၼ်ႉ မိူဝ်ႈထိုင်ၶၢဝ်းယၢမ်းၵေႃႈတေလႆႈႁပ်ႉဢဝ် ဢၵျူဝ်းတြႃး မၼ်းၸွမ်းၼင်ႇလႆႈႁဵတ်းလႆႈသၢင်ႈဝႆႉၼၼ်ႉယူႇယဝ်ႉ ။

 

မိူၼ်ၼင်ႇၵူၼ်းၽုၵ်ႇမၢၵ်ႈမူင်ႈဝႆႉ ပီႊယၢဝ်းၶၢဝ်းႁိုင်မႃး မၢၵ်ႇမူင်ႈတူၼ်ႈယႂ်ႇမႃး ထိုင်ၶၢဝ်းမၼ်းမႃး ၵူၼ်းဢၼ်လႆႈၽုၵ်ႇမၢၵ်ႇမူင်ႈဝႆႉၼၼ်ႉ မၼ်းၶႂ်ႈၵိၼ်မၢၵ်ႇမူင်ႈ ၼၼ်ႉၵေႃႈယဝ်ႉ မၼ်းဢမ်ႇၶႂ်ႈၵိၼ်မၢၵ်ႇမူင်ႈၼၼ်ႉၵေႃႈယဝ်ႉ မၢၵ်ႇမူင်ႈၼၼ်ႉ တိုၼ်းတေမၢၵ်ႇ ပၼ်မၼ်းယူႇယဝ်ႉ ။

 

သင်ဝႃႈၽူႈလႂ်လႆႈၶၢမ်ႇၼင်ႇဢၼ်လႆႈလၢတ်ႈမႃးၸိူဝ်းၼႆႉၼႆၸိုင် ႁႂ်ႈဝူၼ်ႉဝႃႈ ပဵၼ်လူၺ်ႈဝူတ်ႈၵၢမ်ႇဝၼ်းလင်ႁဝ်းလႆႈႁဵတ်းဝႆႉလႄႈၸင်ႇလႆႈပဵၼ်မႃးၼႆၶႃႈလႄႈ ။

 

ဝူတ်ႈၵၢမ်ႇၵူၼ်းႁဝ်းၼႆႉ ၽြႃးပဵၼ်ၸဝ်ႈၵေႃႈဢမ်ႇမေးပၼ်ၵူၼ်းႁဝ်းလႆႈ ၶုၼ်ၽီ ၶုၼ်သၢင် တေႇဝတႃႇ ၶဝ်ၵေႃႈဢမ်ႇမေးပၼ်လႆႈ လႄႈ ၵူၼ်းႁဝ်း ၼင်ႇ ၵၼ်ၵေႃႈ ဢမ်ႇမေးပၼ် ၵၼ်လႆႈ။

 

လွင်ႈတၢင်းၸိူဝ်းၼႆႉ သင်ဝႃႈၵႂႃႇၸူး သြႃႇမေႃၽီ သြႃႇမေႃတူၺ်းပေႇတၢင်ႇ ၵႃႇလႃး ၶဝ်ပေႃးၼႆၸိုင် ၶဝ်တေလၢတ်ႈဝႃႈ ၵျူဝ်ႇဢမ်ႇလီ ပဵၼ်ၵျူဝ်ႇပိူဝ်ႉ ၵျူဝ်ႇဢူၼ်ႈ လူဝ်ႇလႆႈမေးၵျူဝ်ႇ လူဝ်ႇလႆႈတႆႈတဵၼ်းၼႆယဝ်ႉ ။

 

သင်ဝႃႈလႆႈႁဵၼ်းႁူႉၼႂ်းဢရိယသႅတ်ႉၸႃႇၼႆၸိုင်ၶေႃႈထမ်းတြႃးၽြႃးပဵၼ် ၸဝ်ႈလႆႈသင်သွၼ်ဝႆႉပၼ်လၢႆးဢွၵ်ႇပူၼ်ႉၼႂ်းဝူတ်ႈၵၢမ်ႇၵူႈပိူင်တဵမ်ထူၼ်ႈလီ ငၢမ်းဝႆႉယူႇယဝ်ႉ ။

 

ၵၢမ်ႇဢမ်ႇလီၼႆႉၽြႃးပဵၼ်ၸဝ်ႈမေးပၼ်ဢမ်ႇလႆႈ  ၵူၺ်းၵႃႈၽြႃးပဵၼ်ၸဝ်ႈမီး သဵၼ်ႈတၢင်းတႃႇဢွၵ်ႇ ပူၼ်ႉလႆႈလွင်ႈဝူတ်ႈၵၢမ်ႇၼၼ်ႉယူႇ ။

 

လၢႆးမေးၵၢမ်ႇ လၢႆးၵႄႈၵၢမ်ႇဢမ်ႇလီၼၼ်ႉ ၽြႃးပဵၼ်ႁဝ်းၸီႉ ၼေသဵၼ်တၢင်း ပၼ်ဝႆႉယဝ်ႉ ႁဝ်းလူဝ်ႇၵျၢင်ႉၵမ်ႁဵတ်းၸွမ်းဢဝ်ႁင်းၵူၺ်း ။

 

ၼၼ်ႉၵေႃႈ ႑. ယုမ်ႇယမ်ၼႂ်းၽြႃးၿုတ်ꩪၸဝ်ႈ ႒တိုဝ်းၵမ်သိလ်ႁႃႈ ႁႂ်ႈမၼ်ႈ      ႓. ႁူႉၼႂ်းဢရိယသႅတ်ႉၸႃႇ ႔.ၼင်ႈသမထိ ပိူဝ်ႈႁူႉႁၼ်ၸႅင်ႈဝႃႈ ၵူႈလွင်ႈ ဢမ်ႇၸႂ်ႈၵဝ် ဢမ်ႇၸႂ်ၶွင်ၵဝ် ဢမ်ႇၸႂ်ႈတူဝ်ၵဝ် ဢမ်ႇၸႂ်ႈတူဝ်တူၼ်းၶွင်ၵဝ်         ႔ ပိူင်ၼႆႉယဝ်ႉ။

 

သင်ဝႃႈၽူႈလႂ် ၵေႃႉလႂ် မီးလွင်ႈဢၼ်မိူၼ်ၼင်ႇလႆႈလၢတ်ႈၼေ ဝႆႉၸိူဝ်း ၼႆႉၸိုင် ပွင်ႇဝႃႈယၢမ်ႈလႆႈႁဵတ်းၽိတ်းသိလ် မႃးမိူဝ်ႈၸၢတ်ႈၵွၼ်ႇ လႄႈဝၼ်း လင်လႄႈ  မိူဝ်ႈ ၵေႃႉလဵၵ်ႉၼႆယဝ်ႉ ၸၢတ်ႈၼႆႉၸင်ႇလႆႈမႃးၶၢမ်ႇတၢမ်ႇမၼ်း ၶိုၼ်းယဝ်ႉ  ၊ လွင်ႈတၢင်းၸိူဝ်းၼႆႉ  မၼ်း ဢမ်ႇ ၸႂ်ႈ ပဵၼ်လွင်ႈ ၵျူဝ်ႇပိူဝ်ႉၵျူဝ်ႇ ဢူၼ်ႈ သင် မၼ်းဢမ်ႇၸႂ်ႈလွင်ႈၼၶၢတ်ႈလိူၼ်လၢဝ် ႁဵတ်း ပဵၼ် မၼ်းဢမ်ႇၸႂ်ႈ လွင်ႈ ၽိူဝ်ႉၽီႁဵတ်းပဵၼ် ။

 

ၵွပ်ႈၼႆလႄႈဢမ်ႇထုၵ်ႇလီၵႂႃႇႁႃသြႃႇတႆႈတဵၼ်းတႆႈဢၢင်းမေးၵျူဝ်ႇမေးၵိင်း သင်မၼ်းပဵၼ်လွင်ႈၸၢတ်ႈၵွၼ်ႇဝၼ်းလင်ႁဝ်းယၢမ်ႈႁဵတ်းဝႆႉလႄႈၸၢတ်ႈၼႆႉၸင်ႇလႆႈမႃးႁပ်ႉၶၢမ်ႇဢဝ်ၶိုၼ်း မၼ်းပဵၼ် ၵၢမ်ႇဢၼ်ႁဝ်းယၢမ်ႈႁဵတ်းမႃး ဢမ်ႇ ၵပ်းၵၢႆႇ ၵျူဝ်ႇၸတႃႇသင် လွင်ႈၵိင်းၵျူဝ်ႇၸတႃႇဢမ်ႇမီးၼႂ်းသႃသၼႃႇပုတ်ႉထ

ၽြႃးပဵၼ်ၸဝ်ႈသင်ႇသွၼ်ဝႆႉဝႃႈႁႂ်ႈယုမ်ႇၵၢမ်ႇဢၼ်လဵဝ်ၼႆယဝ်ႉၵၢမ်ႇလီၵၢမ်ႇႁၢႆႉၶွင်ႁဝ်းၼႆႉဢမ်ႇမီးၽႂ်ၵႄႈလႆႈ ဢမ်ႇမီးၽႂ်မေးပၼ်လႆႈ မီးတူဝ်ၸဝ်ႈၵဝ်ႇႁဝ်း ၵေႃႉ လဵဝ်ၵူၺ်း ဢၼ်မေးလႆႈ ။

ၽြႃးပဵၼ်ၸဝ်ႈ ဢမ်ႇမေးၵၢမ်ႇလီၵၢမ်ႇႁၢႆႉပၼ်ၽႂ်လႆႈ ၊ ၶုၼ်ၽီၶုၼ်သၢင် တေႇဝတႃႇ ၶဝ်ၵေႃႈ ဢမ်ႇမေးပၼ်ၵၢမ်ႇလီၵၢမ်ႇႁၢႆႉပၼ်ၵူၼ်းလႆႈ ။

သင်ဝႃႈ မေႃၽီ မေႃလူ မေႃတူၺ်းပေႇတၢင်ႇၵႃႇလႃးၶဝ်လၢတ်ႈဝႃႈ ၵၢမ်ႇ လီၵၢမ်ႇႁၢႆႉၼႆႉမေးလႆႈ ဢိူဝ်ႈၼႆ မၼ်းပွင်ႇဝႃႈ ၶဝ်ၶႂ်ႈလႆႈငိုၼ်းႁဝ်းယဝ်ႉ ။