ၵၢၼ်ၵိူတ်ႇၶိုၼ်ႈၶွင်တူင်ႇၵူၼ်းမၼုသ

 ၵၢၼ်ၵိူတ်ႇၶိုၼ်ႈၶွင်တူင်ႇၵူၼ်းမၼုသ

လိၼ်ၵမ်ႇၽႃႇလူင်ၼႆႉဢမ်ႇၸႂ်ႈၶွင်ၽႂ် ဢမ်ႇမီးၽႂ်ပဵၼ်ၸဝ်ႈၶွင် မၼ်းၵိူတ်ႇၶိုၼ်ႈၸွမ်းသၽႃဝၶွင်မၼ်း

ၽြႃးပဵၼ်ၸဝ်ႈလၢတ်ႈၼေၸဝ်ႈ ဝသဵတ်ထႃ လႄႈ ၽႃရထဝႃသ ဝႃႈ ဝၢႆးလင်ၵမ်ႇၽႃႇလူႉလႅဝ်ၵႂႃႇယဝ်ႉ ၼႂ်းၸၵျႃႇဝရႃႇလူင်ၼႆႉမီးၼမ်ႉပဵၼ်ပိူၵ်ႈလႅဝ်

ဢမ်ႇမီးလိၼ်ၵမ်ႇၽႃႇ ဢမ်ႇမီးလိူၼ် ဢမ်ႇမီးလုၵ်ႈတႃဝၼ်း ဢမ်ႇမီးလၢဝ် ၵူၼ်းသတ်းၵေႃႈဢမ်ႇမီး ပဵၼ်လပ်းသိင်ႇၽိုတ်းဝႆႉ ။

ၽွင်းၼင်ႇၼၼ် တေႇဝတႃႇ ၸၼ်ႉဢၽတ်သရ မီးရသမီၼႂ်းတူဝ် မီးပီတီပဵၼ်တၢင်းၵိၼ် တဵမ်ထူၼ်ႈလူၺ်ႈၸႂ် မီးဝိမၢၼ်ႇယူႇၼႂ်းၸၼ်ႉၵၢင်ႁၢဝ် ၵႂႃႇမႃးၼႂ်းဢႃႇၵႃႇသ ။

သိုပ်ႇမႃးတေႇဝတႃႇ ဢၽတ်သရ တၢင်းလၢႆ ၸင်ႇ ဢွၼ် ၵၼ်လေႇၵႂႃႇမႃးၼႂ်းဢႃၵႃသ တီႈၼိူဝ်ၼမ်ႉၼၼ်ႉၵိူတ်ႇမီးငူၼ်ႉလိၼ်ၶိုၼ်ႈ ။

ငူၼ်ႉလိၼ်ၼၼ်ႉမီးၽၢင်ႁၢင်ႈမိူၼ်ၵွၼ်ႈမၼ်းၼိူၺ်း မိူၼ်ၼမ်ႉၼူမ်းဢူၼ် မီးဢႁႃရၸဵမ်းဝၢၼ်ႁွမ် ၵၢမ်ႈဝႆႉယူႇၼိူဝ်ၽိဝ်ၼမ်ႉ ။

မိူဝ်ႈတေႇဝတႃႇ ဢၽတ်သရ လႆႈႁၼ်ငူၼ်ႉလိၼ်ၼၼ်ႉ

ၸင်ႇဢွၼ်ၵၼ်လူင်းၵႂႃႇတီႈၼိူဝ်ၼမ်ႉဢၼ်မီးငူၼ်ႉလိၼ်ၵၢမ်ႈဝႆႉယူႇ ။

တေႇဝတႃႇဢၽတ်သရၼၼ်ႉၸွင်ႇဢဝ်ၼိဝ်မိုဝ်းဝူၺ်ႉ

ဢဝ်ငူၼ်ႉလိၼ်ၼၼ်ႉၸိမ်းတူၺ်း ၊ မိူဝ်ႈတေႇဝတႃႇၶဝ်

ၸိမ်းတူၺ်းငူၼ်ႉလိၼ်ၼၼ်ႉယူႇ ရူသ်ဢႁႃရၶွင်ငူၼ်ႉလိၼ်ၼၼ်ႉလႆႈၽႄႈသၢၼ်ႈၶဝ်ႈတီးၼႂ်းတူဝ်ၶွင်တေဝတႃႇဢၽတ်သရ ။

မိူဝ်ႈတေႇဝတႃႇဢၽတ်သရ ဢွၼ်ၵၼ်ၸိမ်းၵိၼ်ငူၼ်ႉလိၼ်ယူႇ ရသမီၼႂ်းတူဝ်ၶွင်တေႇဝတႃႇၵေႃႈႁၢႆၵႂႃႇ ။

မိူဝ်ႈသႅင်ရသမီၼႂ်းတူဝ်ႁၢႆၵႂႃႇ လုၵ်ႈတႃဝၼ်း လုၵ်ႈလိူၼ် လုၵ်ႈလၢဝ် ၵေႃႈၵိူတ်ႇၶိုၼ်ႈ ၵၢင်းၶိုၼ်း ၵၢင်ဝၼ်းၵေႃႈမီးၶိုၼ်ႈ ။

တေႇဝတႃႇဢၽတ်ႉသရၼၼ်ႉမိူဝ်ႈဢွၼ်ၵၼ်ၵိၼ်ငူၼ်ႉလိၼ်ယူႇ ႁဵတ်းႁႂ်ႈၸပ်းၸႂ်ၼႂ်းရူသ်ႉဢႁႃရၶွင်ငူၼ်ႉလိၼ်တူဝ်ၶိင်းၵေႃႈပေႃႇမႃး သေမီူတူဝ်ၶိင်းဢၼ်ၼၵ်းဝႆႉ ဢမ်ႇၸၢင်ႈပွၵ်ႈမိူဝ်းယူႇတီႈဝိမၢၼ်ႇၵၢင်ႁၢဝ်မိူၼ်ႇၼင်ႇၵဝ်ႇလႆႈ မိူဝ်ႈၶဝ်ဢမ်ႇမိူဝ်းၶိုၼ်းတီႈယူႇၵဝ်ႇလႆႈယဝ်ႉ ၸင်ႇလႆႈၸိုဝ်ႈဝႃႈ သတ်း သတ်း ၽူႈယိုတ်းၸပ်းၼႆယဝ်ႉ ။

မိူဝ်ႈသတ်းတၢင်းလၢႆႈယူႇၼိူဝ်ငူၼ်ႉလိၼ် မီးငူၼ်ႉလိၼ်ပဵၼ်တၢင်းၵိၼ် သတ်းတၢင်းလၢႆမီးတူဝ်ၶိင်းဢၼ်ၵႅၼ်ႇၶႅင်ၶိုၼ်ႈ ။

မိူဝ်ႈသတ်းတၢင်းလၢႆမီးတူဝ်းဢၼ်ၵႅၼ်ႇၶႅင်ၶိုၼ်ႈယူႇ ႁဵတ်းႁႂ်ႈၽိဝ်ၼိူဝ်ႉၼင်သတ်းၵေႃႉၼိုင်ႈလႄႈၵေႃႉၼိုင်းပႅၵ်ႇပိူင်ႈၵၼ် သတ်းၸိူဝ်းၽိဝ်ၼိူဝ်ႉၼင်ႁၢင်ႈလီၵေႃႈသီႇၵေႉသတ်းၽူၼ်မီးၽိဝ်ၼိူဝ်ႉၼင်ႇဢမ်ႇႁၢင်ႈလီ ။

မိူဝ်ႈသတ်းၶဝ်သီႇၵေႉၵၼ်လွင်ႈၽိဝ်ၼိူဝ်ႉၼင်ႉၼင်ႇယူႇ

ငူၼ်ႉလိၼ်ၸင်ႇႁၢႆၵႂႃႇ လႄႈ မီးၵပီလိၼ်ၶိုၼ်းမႃးတႅၼ်းတၢင် သတ်းတၢင်းလၢႆၶဝ်ၸင်ႇၵိၼ် ၵပီလိၼ်ပဵၼ်တၢင်းၵိၼ်ယူႇ ။

ၵၢၼ် ယိုတ်ႈယၢဝ်းၼၢၼ်းသိုပ်ႇမႃးမိူဝ်ႈသတ်းတၢင်းလၢႆၶဝ်ၵိၼ်ၵပီလိၼ်ပဵၼ်တၢင်းၵိၼ်ယူႇ တူဝ်ၶိင်းၵေႃႈၵႅၼ်ႇၶႅင်ၶိုၼ်ႈ လႄႈသတ်းလၢႆၵေႃႈသီႇၵေႉၵၼ်လွင်ၽိဝ်ၼိူဝ်ႉၼင်ယူႇ ၵပီလိၼ်ၸင်ႇႁၢႆၵႂႃႇ ။

မိူဝ်ႈၵပီလိၼ်ႁၢႆၵႂႃႇ မီးလိူဝ်းလိၼ်ၵိူတ်ႇၶ်ုၼ်ႈမႃးတႅၼ်းတၢင် သတ်းတၢင်းလၢႆၸင်ၵိၼ်ၶိူဝ်းလိၼ်ပဵၼ်တၢင်းၵိၼ်သိုပ်ႇမႃး ယိုတ်ႈယၢဝ်းသႅၼ်ၵႆ သတ်းတၢင်းလၢႆၵေႃႈမီးလွင်ႈသီႇၵေႉၵၼ်ယွၼ်ႉၽိဝ်ၼိူဝ်ႉၼင် ၶိူဝ်းလိၼ်ၸင်ႇႁၢႆၵႂႃႇ ။

မိူဝ်ႈၶိူဝ်းလိၼ်ႁၢႆၵႂႃႇ ၵိူတ်ႇမီးၶဝ်ႈသႃလိမႃးတႅၼ်းတၢင်

ၶဝ်သႃလိ ပဵၼ်မဵတ်ႉယႂ်ႇ ဢမ်ႇမီးၵႅပ်ႇ ဢမ်ႇမီးႁမ်းႁေႃႇႁုမ်ႉ ပဵၼ်ၶဝ်ႈဢၼ်ဢွၵ်ႇမႃးယဝ်ႉသုၵ်းပၼ်ၵမ်းလဵဝ် ဢမ်ႇလႆႈတူမ်ႈ ဢမ်ႇလႆႈႁုင် မိူဝ်ႈသတ်းတၢင်းလၢႆၵဵပ်းဢဝ်ၶဝ်ႈသႃလိၼၼ်ႉမႃးၼႂ်းယၢမ်းၸဝ်ႉ ပေႃးထိုင်ႁူဝ်ၶမ်ႈမႃးၶဝ်ႈသလိၼၼ်ႉၵေႃႈမီးဢၼ်မႂ်ႇငွၵ်ႈၶိုၼ်ႈဝႆႉပၼ်

မိူဝ်ႈသတ်းတၢင်းလၢႆမီးၶဝ်သႃလိၵိၼ်ယူႇၼင်ႇၼၼ်ႁိုင်မႃး သတ်းတၢင်းလၢႆမီးလွင်ႈသူင်ၵျိူၵ်ႈဢမ်ႇမိူၼ်ၵၼ် မိူဝ်ႈသတ်းတၢင်းလၢႆမီးလွင်ႈသူင်ၵျိူၵ်ႈဢမ်ႇမိူၼ်ၵၼ်ယူႇ

သတ်းမၢင်ၸိူဝ်းၵေႃႈမီးၶိူင်ႈဢၢင်ႇၵႃႇၼၢင်းပေႃႇမႃး

သတ်းမၢင်ၸိူဝ်းၵေႃႈမီးၶိူင်ႈဢၢင်ႇၵႃႇၵူၼ်းၸၢႆးပေႃႇမႃး

မိူဝ်းသတ်းတၢင်းသွင်ႁၼ်ၵၼ်ၵေႃႈမီးလွင်ႈႁဝ်ႉႁွၼ်ႉၵိူတ်ႇၶိုၼ်ႈတီႈသတ်းတၢင်းသွင် လႄႈသတ်းတၢင်းသွင်ၵေႃႈမီးလွင်ႈသူင်ၸႂ်ၼႂ်းၵၼ်လႄႈၵၼ် ။

မိူဝ်ႈသတ်းတၢင်းသွင်မီးလွင်ႈသူင်ၸႂ်ၼႂ်းၵၼ်လႄႈၵၼ်ယူႇ လႄႈသတ်းတၢင်းသွင်ၸင်ႇယူႇႁူမ်ႈၵၼ် လႄႈႁူမ်ႈၵႃႇမၵၼ် ။

မိူဝ်ႈသတ်းတၢင်းလၢႆလႆႈႁၼ်သတ်းတၢင်းသွင်ႁူမ်ႈၵႃႇမၵၼ်ယူႇ ၸင်ႇဢဝ်ၽုၼ်ႇၽုၵ်းသႂ်ၽွင်ႈ ဢဝ်ၶီဝူဝ်းၽၢတ်ႇသႂ်ႇၽွင်ႈ လႄႈလႃႇဝႃႈသတ်းၽူႈလိူင်းၸိူင်းၽွင်ႈ ။

ႁိုင်မႃးသတ်းတၢင်းသွင်ၸင်ႇႁဵတ်းသုမ်ႉသေယူႇပိူဝ်ႈဢမ်ႇႁႂ်ႈသတ်းတၢင်းလၢႆႁၼ်ၶဝ်ႁူမ်ႈၵၢမ်ႇမၵၼ် ။

ႁိုင်မႃးၶၢဝ်းဢၼ်ယိုတ်းယၢဝ်းၼၢၼ်း သတ်းတၢင်းလၢႆၶဝ်ဢွၼ်ၵၼ်ႁဵတ်းသုမ်ႉႁဵတ်းႁိူၼ်းသေယူႇ ။

မိူဝ်ႈသတ်းတၢင်းလၢႆၶဝ်မီးသုမ်ႉမီးႁိူၼ်းသေယူႇၼၼ်ႉ သတ်းပၢင်ၸိူဝ်းၶီႈၶၢၼ်ႉသေၵႂႃႇၵဵပ်းဢဝ်ၶဝ်သႃလိမႃးဝႆႉၵိၼ်ပွၵ်ႈၼိုင်ႈ သွင်ဝၼ်းၽွင်ႈ ၸဵတ်းဝၼ်းၽွင်ႈ ႁဵတ်းႁႂ်ႈၶဝ်သႃလိၼၼ်ႉၼဝ်ႈသေ ယဵၼ်းပဵၼ်မဵတ်ႉၶဝ်ႈလဵၵ်ႉလဵၵ်ႉမီးႁမ်းမီးၵႅပ်ႇႁေႃႇႁုမ်ႉမဵတ်ႉၶဝ်ႈၼၼ်ႉသေဢမ်ႇၵိၼ်လႆႈၵမ်းလဵဝ် တေလႆႈတမ် လႆႈႁုင် သေၸင်ႇၵိၼ်လႆႈ။

–--------

ၶေႃႈမုလ်း ပီတၵၢတ်ႈ ၸိုဝ်ႈ ပႃတိၵဝႂၢၵ်ႈ ထိၶၼိၵႃယ

ပပ်ႉထိ 11/70-80/34-47