လွင်ႈမီးၶိုၼ်ႈၶွင် တထႃၶတ ၽြႃးပဵၼ်ၸဝ်ႈ မီးလႆႈယၢပ်ႇၼႃႇၼႂ်းလေႃႈၵၼႆႉ [ ႒ ]

 

လွင်ႈမီးၶိုၼ်ႈၶွင် တထႃၶတ ၽြႃးပဵၼ်ၸဝ်ႈ မီးလႆႈယၢပ်ႇၼႃႇၼႂ်းလေႃႈၵၼႆႉ  [ ႒ ]

 

[ၶေႃႈမုလ်းပီတၵတ်ႈၽၢႆထႆး -ปาลิ.  มหาวาร. สํ. ๑๙ / ๕๖๘ / ๑๗๔๔ ]

 

 ၽိၵ်ၶူတၢင်းလၢႆ ! သင်ၸိူဝ်ႉဝႃႈ မႁႃပတပ်ၽီးဢၼ်ယႂ်ႇလူင်ၼႆႉ မီးၼမ်ႉ ထူမ်ႈပဵၼ်ဢၼ်လဵဝ်တၢင်းမူတ်း မီးပုရုသ်ၵေႃႉၼိုင်ႈ ပႅတ်ႈဢႅၵ်ႇမႆႉဢၼ်မီး ႁူးလဵဝ်လူင်းၼႂ်းၼမ်ႉၼၼ်ႉ ၊ လူမ်းတၢင်းဢွၵ်ႇၽတ်ႉႁႂ်ႈလႆၵႂႃႇတၢင်းတူၵ်း လူမ်းတၢင်းတူၵ်းၽတ်ႉႁႂ်ႈလႆၵႂႃႇတၢင်းဢွၵ်ႇ

 

လူမ်းတၢင်းၼိူဝ်(တၢင်းႁွင်ႇ)ၽတ်ႉႁႂ်ႈလႆၵႂႃႇ တၢင်းတႂ်ႈ (တၢင်းၸၢၼ်း) လူမ်းတၢင်းတႂ်ႈ(တၢင်းၸၢၼ်း)ၽတ်ႉႁႂ်ႈလႆၵႂႃႇတၢင်းၼိူဝ်(တၢင်းႁွင်ႇ) ယူႇၸိူင်ႉၼၼ် ၊ ၼႂ်းၼမ်ႉၼၼ်ႉမီးတဝ်ႇတူဝ်ၼိုင်ႈ တႃမွတ်ႇ လူင်ႈပူၼ်ႉၵႂႃႇ ၼိုင်ႈ ပၢၵ်ႇပီႊ တဝ်ႇတႃမွတ်ႇၽုတ်းၶိုၼ်ႈမႃးၼိူဝ်ၼမ်ႉၼိုင်ႈပွၵ်ႈ

 

ၽိၵ်ၶူတၢင်းလၢႆ ! ၸိူဝ်းသူတေဝူၼ်ႉၸိူင်ႉႁိုဝ် ၸွင်ႇၸၢင်ႈပဵၼ်လႆႈႁိုဝ် တဝ်ႇတႃမွတ်ႇၼၼ်ႉၼိုင်ႈပၢၵ်ႇပီႊ ၽုတ်းၶိုၼ်ႈမႃးၼိူဝ်ၼမ်ႉၵမ်းၼိုင်ႈသေ ဢဝ်ၶေႃးသွတ်ႇၶဝ်ႈၼႂ်းႁူးဢၼ်မီးယူႇႁူးလဵဝ် တီႈဢႅၵ်ႇမႆႉၼၼ်ႉ?

 

ၶေႃႈၼႆႉယၢပ်ႇၼႃႇပဵၼ်ၵႂႃႇဢမ်ႇလႆႈ ၽြႃးပဵၼ်ၸဝ်ႈၶႃႈ! တဝ်ႇတႃမွတ်ႇ ၼၼ်ႉ ပၢၵ်ႇပီႊၽုတ်းၶိုၼ်ႈမႃးၼိုင်ႈပွၵ်ႈသေဢဝ်ၶေႃးသွတ်ႇၶဝ်ႈၼႂ်းႁူးဢၼ်မီးယူႇ ႁူးလဵဝ်တီႈဢႅၵ်ႇမႆႉၼၼ်ႉ”.

 

ၽိၵ်ၶူတၢင်းလၢႆ ! တႃႇပဵၼ်လႆႈၼႆႉယၢပ်ႇၼႃႇ ၊ မိူၼ်ၵၼ် တီႈၽႂ်ၽႂ်တေ လႆႈၵိူတ်ႇပဵၼ် မၼုသ (ၵူၼ်း) ၼႆႉၵေႃႈယၢပ်ႇၼႃႇတႃႇပဵၼ်လႆႈ ၊ မိူၼ်ၵၼ် ဢၼ်တထႃၶတသံမႃသံၿုတ်ႉထ တေၵိူတ်ႇၶိုၼ်ႈမႃး ၼႂ်းလေႃးၵၼႆႉၵေႃႈ ယၢပ်ႇၼႃႇ ၊ မိူၼ်ၵၼ် ထမ်းဝိၼၺ်းဢၼ်ၽြႃးပဵၼ်ၸဝ်ႈပိုၼ်ၽေႈဝႆႉ ယဝ်ႉႁႂ်ႈႁိူဝ်ႈႁိူင်းပိူင်းသႂ်ၼႂ်းလေႃးၵ (ၵမ်ႇၽႃႇ)

 

 

ၽိၵ်ၶူတၢင်းလၢႆ ! ၵူၺ်းၵႃႈယၢမ်းၼႆႉ  ၽဝၵူၼ်း(မၼုသ)ၵေႃႈလႆႈယဝ်ႉ တထႃၶတဢရႁံတႃသံမႃသံပုတ်ႉထၽြႃးပဵၼ်ၸဝ်ႈၵေႃႈၵိူတ်ႇၶိုၼ်ႈမႃး ၼႂ်းလေႃးၵယဝ်ႉ ထမ်းလႄႈဝိၼၺ်းဢၼ် တထႃၶတၽြႃးပဵၼ်ၸဝ်ႈ ႁေႃးၼေဝႆႉလီယဝ်ႉ ပိုၼ်ၽေႈဝႆႉၵေႃႈႁိူဝ်ႈႁိူင်းပိူင်းသႂ်ယဝ်ႉ

 

ၽိၵ်ၶူတၢင်းလၢႆ ! ၵွပ်ႈၸိူင်ႉၼႆ ၼႂ်းလွင်ႈၼႆႉ ၸိူဝ်းသူၸိုင်ႁဵတ်း ယေႃးၶၵံ ပိူဝ်ႈႁႂ်ႈႁူႉဝႃႈ  ၼႆႉပဵၼ်တုၵ်ႉ  ၼႆႉပဵၼ်လွင်ႈႁဵတ်းႁႂ်ႈပဵၼ်တုၵ်ႉ ၼႆႉလွင်ႈမွတ်ႇႁၢႆ ၶွင်တၢင်းတုၵ်ႉ ၼႆႉပဵၼ်ႁူၼ်တၢင်းႁႂ်ႈထိုင်လွင်ႈမွတ်ႇဢမ်ႇႁႂ်ႈမီးလိူဝ်ၶွင် တၢင်းတုၵ်ႉ တၢင်းလၢႆ ။