လွင်ႈၵျၢင်ႉၵမ်ႁဵတ်းၸွမ်း ဢႃၼႃပႃၼသတိ ႁဵတ်းႁႂ်ႈ သတိပထၢၼ်သီႇ လႄႈ ၽူတ်ႉသုင်းၸဵတ်း ဝိၸႃႇ လႄႈ ဝိမုတ်တဵမ်ထူမ်ႈ

 

လွင်ႈၵျၢင်ႉၵမ်ႁဵတ်းၸွမ်း ဢႃၼႃပႃၼသတိ ႁဵတ်းႁႂ်ႈ

သတိပထၢၼ်သီႇ လႄႈ ၽူတ်ႉသုင်းၸဵတ်း ဝိၸႃႇ လႄႈ ဝိမုတ်တဵမ်ထူမ်ႈ

ဢၢင်ႈဢိင်ၶေႃႈမုလ်းၼႂ်းပီတၵၢတ်ႈၽၢႆထႆး -บาลี อุปริ. ม. ๑๔/๑๙๐/๒๘๒.

 

ၽိၵ်ၶူတၢင်းလၢႆ ! ႁဝ်းပဵၼ်ၽူႈတင်ႈမၼ်ႈယဝ်ႉၼႂ်းၶေႃႈပတိပတ်ႈၼႆႉ

ၽိၵ်ၶူတၢင်းလၢႆ !ႁဝ်းပဵၼ်ၽူႈမီးၸႂ်တင်ႈမၼ်ႈယဝ်ႉၼႂ်းၶေႃႈပတိပတ်ႈၼႆႉ

ၽိၵ်ၶူတၢင်းလၢႆၵွပ်ႈၸိူင်ႉၼၼ်ၼႂ်းလွင်ႈၼႆႉၸိူဝ်းသူတၢင်းလၢႆၵျၢင်ႉၵမ်  တိူဝ်းႁႅင်းလိူဝ်ၵဝ်ႇ ပိူဝ်ႈႁႂ်ႈထိုင်တီႈဢၼ်ဢမ်ႇပႆႇထိုင် ပိူဝ်ႈႁႂ်ႈႁူႉလွင်ႈဢၼ် ဢမ်ႇပႆႇႁူႉ  ပိူဝ်ႈႁႂ်ႈၸႅင်ႈ လွင်ႈ ဢၼ်ဢမ်ႇ ပႆႇႁူႉၸႅင်ႈ ။

 

ႁဝ်းတေမွင်းပႂ်ႉၸိူဝ်းသူတၢင်းလၢႆယူႇ ၼ တီႈမိူင်းသႃႇဝထိၼႆႉလႄႈ တေႃႇပေႃးထိုင် ဝၼ်းလိုၼ်းသုတ်းၶွင်ၶၢဝ်းၽူၼ်တဵမ်သီႇလိူၼ် ပဵၼ်ၶၢဝ်းဢၼ်မွၵ်ႇၵူဝ်မုတ်းၵီႈ ( မွၵ်ႇမူဝ် ) (လိူၼ်သိပ်းသွင်မူၼ်း ) ။

 

“ၸဝ်ႈၽိၵ်ၶူ ၸိူဝ်းယူႇၸမ်လႄႈၵႆ မိူဝ်ႈလႆႈႁူႉၶၢဝ်ႇဝႃႈ ၽြႃးပဵၼ်ၸဝ်ႈ ဢဝ်ဝႃႇၵႃႈတီႈ  မိူင်းသႃဝထိ ယဝ်ႉၵေႃႈဢွၼ်ၵၼ်လင်ႇလႆႈ မိူဝ်းဝႆႈ သႃ ၵႃရဝ တမ်ႈတီႈၽြႃးပဵၼ်ၸဝ်ႈ ။ ၽၢႆႇၽိၵ်ၶူထေႇရ  ၸိူဝ်းမီးၸိုဝ်ႈသဵင် ဢၼ်ၽူႈၵူၼ်းႁူႉၸၵ်းၼမ်ၼၼ်ႉ မီးၸဝ်ႈ သႃရိပုတ်ႇ (သႃရိပုၵ်ႉတြႃႇ) ၸဝ်ႈမႁႃမူၵ်ႉၵလၢၼ်ႇ ၸဝ်ႈမႁႃၵသပ ၸဝ်ႈမႁႃၵၸႃယႃၼ ၸဝ်ႈမႁႃၵူတ်ထိတႃ  ၸဝ်ႈမႁႃၵႃပိၼ်ၼ ၸဝ်ႈမႁႃၸုၼ်ထ ၸဝ်ႈရေဝတႃႇ ၸဝ်ႈဢၼၼ်ႇတႃႇ လႄႈၸဝ်ႈၽိၵ်ႉၶူထေႇရ ထႅင်ႈတၢင်း ၼမ် မႅင်ႇပဵၼ်ၸုမ်းသေ လၢႆၸုမ်း ဢၼ်ၵၼ်သင်ႇသွၼ်ၸဝ်ႈၽိၵ်ႉၶူ မႂ်ႇၶဝ်ၼင်ႇတဵမ်ထူၼ်ႈ ၼိုင်ႈၸုမ်းလႂ် သိပ်းၸဝ်ႈၽွင်ႈ သၢဝ်းၸဝ်ႈၽွင်ႈ သၢမ်သိပ်းၸဝ်ႈၽွင်ႈ သီႇသိပ်းၸဝ်ႈၽွင်ႈ ၸိူဝ်းၸဝ်ႈၽိၵ်ႉၶူ ရႁၢၼ်းမႂ်ႇ ၶဝ်ႈၸဝ်ႈၵေႃႈ မိူဝ်ႈလႆႈႁပ်ႉၶေႃႈသင်ႇသွၼ် လႆႈႁပ်ႉလွင်ႈၵျၢင်ႉၵမ်  တီႈထေႇရ ၽူႈမီးၸိုဝ်ႈသဵင်တၢင်ႈလၢႆၵေႃႈယွမ်ႉႁူႉၶုၼ်ဝိသဵတ်ႇၵူႈပိူင် တွၼ်းလိူဝ်သေ မိူဝ်ႈၵွၼ်ႇ တေႃႇပေႃးႁွတ်ႈထိုင် လိူၼ်သိပ်းသွင်မူၼ်း( ၶၢဝ်းမွၵ်ႇၵူဝ်မုတ်းၵီႈ)

 

 

ယၢမ်းၼင်ႇၼၼ် ၽြႃးပဵၼ်ၸဝ်ႈၸင်ႇလၢတ်ႈတီႈၽိၵ်ႉၶူတၢင်းလၢႆၶဝ်ဝႃႈ

 

ၽိၵ်ၶူတၢင်းလၢႆ ! ၽိၵ်ၶူ ၼႂ်းပရိၵ်ႈသၢတ်ႈၼႆႉ ဢမ်ႇပႅတ်ႈလၢႆယဝ်ႉ

ၽိၵ်ၶူတၢင်းလၢႆ ! ၽိၵ်ၶူ ၼႂ်းပရိၵ်ႈသၢတ်ႈၼႆႉ ဢမ်ႇယွၵ်းလႅဝ်ယဝ်ႉ

ၽိၵ်ၶူ ၼႂ်းပရိၵ်ႈသၢတ်ႈၼႆႉ တင်ႈယူႇၼႂ်းထမ်းဢၼ်မီးလွၼ်ႉ ၵႅၼ် သဵင်ႈယဝ်ႉ

ၽိၵ်ၶူတၢင်းလၢႆ ! ပရိၵ်ႈသၢတ်ႈၸိူဝ်းလႂ် မီးပိူင်ၽၢင်ႁၢင်ႈလီပူႇၸေႃႇ လီႁပ်ႉတွၼ်ႈ လီထၵ်းသီၼထၢၼ် လီၵွမ်းဝႆႈသႃ  (ဢၺ်းသလီ) ပဵၼ်ၼိူဝ်ႉၼႃးမုၼ်ၸၼ်ႉလီတွၼ်းၶွင်လေႃးၵၼႆႉ  မူႇၽိၵ်ၶူၸိူဝ်းၼႆႉၵေႃႈမီးပိူင်မိူၼ်ၼင်ႇၸိူဝ်းၼၼ်ႉမိူၼ်ၵၼ် ။

 

ၽိၵ်ၶူတၢင်းလၢႆ ! ပရိၵ်ႈသၢတ်ႈလႂ်မီးပိူင်ၽၢင်ႁၢင်ႈဢၼ်ၸၢဝ်းၼႂ်းလေႃးၵ ၶဝ်လႆႈႁၼ်ယၢပ်ႇ မူႇၽိၵ်ၶူၸိူဝ်းၼၼ်ႉပဵၼ်ၸိူင်ႉၼင်ႇၼၼ် ၽိၵ်ႉၶူၼႂ်း ပရိၵ်ႈသၢတ်ႈၼႆႉၵေႃႈမီးပိူင်ၽၢင်ႁၢင်ႈ မိူၼ်ၸိူင်ႉၼင်ႇၼၼ် ။

 

ၽိၵ်ၶူတၢင်းလၢႆ ! ၼႂ်းပရိၵ်ႈသၢတ်ႈလႂ် မီးပိူင်ၽၢင်ႁၢင်ႈဢၼ် ၵိုင်ႇလီ ၵႂႃႇတူၺ်းၵႃႇလူႇ ၵႂႃႇႁၼ် သမ်ႉဝႃႈတေလႆႈပႆၼိူဝ်သဵၼ်ႈတၢင်းယၢဝ်းၵႆ ၼပ်ႉယူဝ်ႇၸၼႃႇ ထိုင်သမ်ႉပေႃးလႆႈပႃးႁေႃႇၶဝ်ႈ ႁေႃႇၽၵ်းၵႂႃႇၸွမ်း မူႇၽိၵ်ႉၶူ မီးပိူင်ၽၢင်ႁၢင်ႈၼင်ႇၼၼ်  ၽိၵ်ၶူၸိူဝ်းၼႆႉၵေႃႈမီးၽၢင်ႁၢင်ႈ ၼင်ႇၼၼ် ၽိၵ်ႉၶူၼႂ်းပရိၵ်ႈသၢတ်ႈၼႆႉၵေႃႈ မီးပိူင်ၽၢင်ႁၢင်ႈ မိူၼ်ၸိူင်ႉၼင်ႇ ၼၼ် ။

 

ၽိၵ်ၶူတၢင်းလၢႆ ! ၼႂ်းမူႇၽိၵ်ႉၶူၼႆႉ မီးၽိၵ်ႉၶူၸိူဝ်းပဵၼ်ဢရႁၼ်တႃ ၽူႈ ဢၼ်ဢႃသဝမူတ်း သဵင်ႈယဝ်ႉ ၽူႈဢၼ်ယူႇသုတ်းၽရူမ်းမၸၼ်ယဝ်ႉ  မီးလွင်ႈဢၼ်လူဝ်ႇႁဵတ်းၵေႃႈလႆႈႁဵတ်း ယဝ်ႉတူဝ်းလီငၢမ်းယဝ်ႉ မီးပုၼ်ႈ ဢၼ်ပူင်လႆႈယဝ်ႉ၊ မီးၽွၼ်းလီၼႂ်းတူဝ်ၵဝ်ႇႁူႉၸႅင်ႈ မီးသၺ်ယုတ်ႉၼႂ်း ၽဝသုတ်းသဵင်ႈယဝ်ႉ လုတ်ႈပူၼ်ႉယဝ်ႉ ၵွပ်ႈႁူႉႁၼ်ၸွမ်းလွင်ႈထုၵ်ႇမႅၼ်ႈ  ၽိၵ်ၶူၸိူဝ်းၼၼ်ႉၵေႃႈ မီးယူႇၼႂ်းမူႇၽိၵ်ႉၶူၸိူဝ်းၼႆႉ ။

 

ၽိၵ်ၶူတၢင်းလၢႆ ! ၼႂ်းမူႇၽိၵ်ႉၶူၼႆႉ မီးၽိၵ်ႉၶူဢၼ်သၺ်ယုတ်ႉပိူင်ႈတႅမ်ႇႁႃႈ ပိူင်သဵင်ႈယဝ်ႉ ပဵၼ်သေႃးတႃႇပၢၼ်ႇ ယဝ်ႉ ၸင်ႇပရိၼိပ်ႉပၢၼ်ႇ ၼႂ်း တီႈၼၼ်ႉ

 

ဢမ်ႇၶိုၼ်းပွၵ်ႈမႃးၼႂ်း လေႃးၵၼႆႉ ပဵၼ်ထံမတႃႇ ၽိၵ်ႉၶူၸိူဝ်း ၼၼ်ႉၵေႃႈ မီးယူႇၼႂ်းမူႇၽိၵ်ၶူၸိူဝ်းၼႆႉ ။

 

ၽိၵ်ၶူတၢင်းလၢႆ ! ၼႂ်းမူႇၽိၵ်ႉၶူၼႆႉ မီးၽိၵ်ႉၶူၸိူဝ်းဢၼ်သၺ်ယုတ်ႉသၢမ် မူတ်းသဵင်ႈယဝ်ႉႉ မီးရႃၶ တေႃးသ မေႃးႁ မဝ်မၢင်ယူႇ ပဵၼ်သၵထႃၶႃမီ မႃးသူႇၼႂ်းလေႃးၵၼႆႉထႅင်ႈပၢၼ် လဵဝ်ၸင်ႇၶဝ်ပရိၼိပ်ႉ ပၢၼ်ႇၼႂ်း တီႈ သုတ်း ၽိၵ်ႉၶူၸိူဝ်းၼၼ်ႉၵေႃႈ မီးယူႇၼႂ်းမူႇ ၽိၵ်ၶူၸိူဝ်းၼႆႉ ။

 

ၽိၵ်ၶူတၢင်းလၢႆ ! ၼႂ်းမူႇၽိၵ်ႉၶူၼႆႉ ၽိၵ်ႉၶူၸိူဝ်းဢၼ်သၺ်ယုတ်ႉသၢမ်မူတ်း သဵင်ႈယဝ် ပဵၼ်သေႃးတႃႇပၢၼ်ႇ ဢၼ်ဢမ်ႇတူၵ်းတႅမ်ႇပဵၼ်ထံမတႃႇ ပဵၼ်ၽူႈမၼ်ႈၵိုမ်းယူႇ ၽူႈဢၼ် တေႁူႉၸႅင်ႈၼႂ်းၽၢႆႇၼႃႈ ၽိၵ်ႉၶူၸိူဝ်း ၼၼ်ႉ ၵေႃႈ မီးယူႇၼႂ်းမူႇၽိၵ်ၶူၸိူဝ်းၼႆႉ ။

 

ၽိၵ်ၶူတၢင်းလၢႆ ! ၼႂ်းမူႇၽိၵ်ႉၶူၼႆႉ မီးၽိၵ်ႉၶူၸိူဝ်းဢၼ်ၵျၢင်ႉၵမ်လီ ယူႇ တႃႇသေႇ သင်ႇသွၼ် တူဝ်ၸႂ်လူၺ်ႈ သတိပထၢၼ်သီႇ သမပ်ႉပထၢၼ် သီႇ ဢီထိပၢတ်ႇသီႇ ဢိၼ်သရီႁႃႈ  ၽူတ်ႉသုင်းၸဵတ်း ဢရိယမၢၵ်ႈၵၢင်ႇ ပႅတ်ႇပႃး မီးမႅတ်ႉတႃႇ ၵရုၼႃႇ မုထိတႃႇ ဢုပိၵ်ႉၶႃႇ  ဢသူၽ ဢၼိၸ သၺ်ၺႃး လႄႈ ဢႃၼႃပႃၼႃသတိ  ၽိၵ်ႉၶူၸိူဝ်းၼၼ်ႉၵေႃႈ မီးယူႇ ၼႂ်းမူႇၽိၵ်ၶူၸိူဝ်းၼႆႉ ။

 

ၽိၵ်ၶူတၢင်းလၢႆ ! ဢႃၼႃပႃၼသတိ သံမႃထိၼႆႉယဝ်ႉ မိူဝ်ႈပူၵ်ႉၵူလ်ႇ ၵျၢင်ႉၵမ်ယဝ်ႉ ၵျၢင်ႉၵမ် ယူႇတႃႇသေႇယဝ်ႉ ယွမ်ႉႁဵတ်းႁႂ်ႈသတိပထၢၼ် သီႇ တဵမ်ထူၼ်ႈ သတိပထၢၼ်တင်းသီႇ ဢၼ်ပူၵ်ႇၵူလ်ႇ ၵျၢင်ႉၵမ်လႄႈ ၵျၢင်ႉၵမ် ယူႇတႃႇသေႇယဝ်ႉ ၸင်ႇႁဵတ်းႁႂ်ႈၽူတ်ႉသုင်းၸဵတ်း တဵမ်ထူၼ်ႈ ၽူတ်ႉ သုင်း တင်းၸဵတ်း ဢၼ်ပူၵ်ႉၵူလ်ႇၵျၢင်ႉၵမ်လႄႈ ၵျၢင်ႉၵမ်ယူႇတႃႇသေႇယဝ်ႉ ၸင်ႇႁဵတ်းႁႂ်ႈ ဝိၸႃႇလႄႈဝိမုတ် တဵမ်ထူၼ်ႈသူမ်ပုလ်းလီလႆႈယဝ်ႉ ။